გორის მუნიციპალიტეტში, საოკუპაციო ხაზთან მცხოვრები მოსახლეობა სახელმწიფოს უსაფრთხოების გარანტებს სთხოვს.

,,ნიუპოსტის“ კორესპონდენტის ცნობით, სოფელბში საგაზაფხულო სამუშაოები უკვე დაიწყო, რაც ინციდენტების რისკს მნიშვნელოვნად ზრდის. სოფელ ფლავის მცხოვრებლები ამბობენ, რომ სასოფლო სამეურნეო სამუშაოებს ქართველი სამართალდამცველების ზედამხედველობის ქვეშ ახორციელებენ, იქვე ახლოს არიან ოკუპანტებიც რომლებიც მათ გადაადგილებას სისტემატიურად აკონტროლებენ. ადგილობრივი მკვიდრი დავით ნარჩემაშვილი აცხადებს, რომ სოფელში ქართველი სამართალდამცველების პატრულირების მიუხედავად, უსაფრთხოების გარანტიები დაცული მაინც არ არის და ამას საოკუპაციო რეჟიმის მიერ ფლავიდან გატაცებულების სტატისტიკაც მომწობს. რუსმა ოკუპანტებმა ბოლო ორი კვირის განმავლობაში, ფლავიდან და ფლავისმანიდან 3 ადამიანი გაიტაცეს.

ორი მათგანი დე-ფაქტო ცხინვალმა, ე.წ. საზღვრის გადაკვეთისთვის დაწესებული ჯარიმის გადახდის შემდეგ გაათავისუფლა. ერთი კი ამ დრომდე უკანონო პატიმრობაში რჩება.