„კასპის მოსახლეობა პრობლემებს მაჟორიტარის ბილბორდს უყვება“-ირაკლი მეზურნიშვილს ამომრჩევლის დავიწყებაში ადანაშაულებენ

პოლიტიკა - 15:34, 29 Mar, 2017

4809

ენმ-ს კასპის რაიონული ორგანიზაციის ხელმძღვანელი რობერტ კავთიაშვილი, კასპის მაჟორიტარ დეპუტატს ირაკლი მეზურნიშვილს, ამომრჩევლისადმი გამოჩენილ უყურადღებობაში ადანაშაულებს.
კავთიაშვილის თქმით, კასპში მცხოვრებლები, მუნიციპალიტეტში არსებულ პრობლემებს მაჟორიტარი დეპუტატის იმ ბილბორდს უყვებიან, რომელიც ქალაქში წინა საარჩევნოდ განთავსდა, რადგან მეზურნიშვილი საკუთარ ამომრჩეველს არჩევნების შემდეგ აღარ უნახავს.

„ირაკლი მეზურნიშვილმა საკუთარი ბილბორდი დაგვიტოვა კასპელებს, ძალიან რომ მოგენატრებით შეხედავთ ბილბორდს და დაიკმაყოფილებთ ამ შეგრძნებასო. ირაკლი მეზურნიშვილი არჩევნების შემდეგ არ ყოფილა კასპში. მან დაივიწყა ის დაპირებები რაც ხალხს მისცა და არა თუ დაივიწყა, არამედ აქაც კი აღარ ჩამოდის, რომ ამომრჩევლები მივიდნენ და უშუალოდ შეახსენონ პრობლემები“-აცხადებს რობერტ კავთიაშვილი „ნიუპოსტთან“ საუბრისას.

რაც შეეხება ბრალდების ადრესატს, ის კავთიაშვილის განცხადებას სიცრუეს უწოდებს.

„ეს არ შეესაბამება სიმართლეს და აფსოლიტური სიცრუეა. მაგრამ ეს მოსალოდნელია „ნაციონალური მოძრაობისაგან“, უკვე დემამოგიაც აღარ არის. მე მქონდა შეხვედრები ჩვენი მუნიციპალიტეტის მოსახლეობასთან, ვეცნობი პრობლემებს. ეხლა ამინდიც გამოვიდა და დაიწყება დიდ სოფლებში გასვლა, რათა ადგილზე მოხდეს იდენტიფიცირება იმ პრობლემების რაც გააჩნია მოსახლეობას“-აცხადებს კასპის მაჟორიტარი დეპუტატი ირაკლი მეზურნიშვილი.