ვიზალიბერალიზაციის ისტორიულ ფაქტთან დაკავშირებით, საქართველოს პრემიერ-მინისტრი გიორგი კვირიკაშვილი, დელეგაციის წევრებთან ერთად, ვიზიტით ევროპის პოლიტიკურ ცენტრს - ბრიუსელს ეწვია.

პირველი შეხვედრა გიორგი კვირიკაშვილმა ევროპული საბჭოს პრეზიდენტთან გამართა. დონალდ ტუსკმა საქართველოს მთავრობის მეთაურს ევროკავშირის/შენგენის ქვეყნებში უვიზო მიმოსვლის ამოქმედება მიულოცა და იმედი გამოთქვა, რომ საქართველო კიდევ უფრო მეტი შემართებით გააგრძელებს ევროინტეგრაციის დღის წესრიგით განსაზღვრული მიზნების განხორციელებას.

გიორგი კვირიკაშვილმა დონალდ ტუსკს საქართველოს ვიზალიბერალიზაციის პროცესში შეტანილი პირადი წვლილისთვის მადლობა გადაუხადა და მას ევროპული საბჭოს პრეზიდენტად ხელმეორედ არჩევა მიულოცა.

პრემიერის განცხადებით, სავიზო რეჟიმის ლიბერალიზაცია მნიშვნელოვანი მოტივაციაა ქვეყანაში დადებითი ცვლილებების განსახორციელებლად. მანვე იმედი გამოთქვა, რომ საქართველო მაქსიმალურად გამოიყენებს ევროკავშირთან პოლიტიკური ასოცირებისა და ეკონომიკური ინტეგრაციის შესაძლებლობებს.

"ჩემთვის დიდი პატივია, ვიყო ბრიუსელში და აღვნიშნო ეს ისტორიული მომენტი. ჩვენ შევძელით დაგვეგვირგვინებინა ვიზალიბერალიზაცია საქართველოსათვის და გაგვემართლებინა ორმხრივი თანამშრომლობა. ეს იყო გამოწვევაც და საერთო ძალისხმევაც. ჩვენ პოზიტიური რეფორმები განვახორციელეთ. ჩვენ განვახორციელეთ ფუნქციური, საკონონმდებლო და ინსტიტუციური რეფორმები, რათა დაგვეკმაყოფილებინა ყველა მოთხოვნა. სავიზო რეჟიმის შეჩერებამ საქართველო მიიყვანა წარმატებულ შედეგებამდე. ეს იქნება წარმატებული ნაბიჯი საქართველოს მოქალაქეებისთვის. ჩვენ დავსახეთ საბოლოო ნაბიჯები და მიზნები - ეს გახლავთ, ეკონომიკური და პოლიტიკური მიზნები, რომელიც ხელმოწერილი იყო ასოცირების საფუძველზე. ჩვენ გვინდა, რომ მომავალი აღმოსავლეთის პარტნიორობის სამიტი უფრო წარმატებული და უფრო თანამშრომლობითი იყოს. ჩვენ ვაგრძელებთ ჩვენი ამბიციური გეგმების გაღრმავებას მომავალში. დიდი მადლობა მინდა გადაგიხადოთ", - განაცხადა საქართველოს პრემიერ-მინისტრმა დონალდ ტუსკთან შეხვედრის დროს.

ბრიუსელში გამართულ შეხვედრას საქართველოს ვიცე-პრემიერი, განათლებისა და მეცნიერების მინისტრი ალექსანდრე ჯეჯელავა, საგარეო საქმეთა მინისტრი მიხეილ ჯანელიძე, ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი ვიქტორ დოლიძე, პრემიერ-მინისტრის მრჩეველი საგარეო ურთიერთობების საკითხებში თედო ჯაფარიძე დაესწრნენ.