გიორგი კვირიკაშვილი დღეს ოფიციალური ვიზიტით უკრაინას ეწვევა

პოლიტიკა - 09:59, 27 Mar, 2017

1592

საქართველოს პრემიერ-მინისტრი გიორგი კვირიკაშვილი 27 მარტს, ოფიციალური ვიზიტით უკრაინას ეწვევა. ეს მისი პირველი ვიზიტი იქნება კიევში.

კვირიკაშვილი სუამ-ის წევრ სახელმწიფოთა მთავრობების მეთაურების სხდომაში მიიღებს მონაწილეობას. სხდომის ფარგლებში დაგეგმილია დოკუმენტებზე ხელმოწერის ცერემონია.

სუამ-ის წევრ სახელმწიფოთა მთავრობების მეთაურები ასევე მონაწილეობას მიიღებენ ბიზნესფორუმში, რომელიც საქართველოს სავაჭრო-სამრეწველო პალატის ორგანიზებით გაიმართება. ქართული მხრიდან ფორუმზე 20-მდე კომპანია იქნება წარმოდგენილი. მათ შორის ტრასპორტის, მსუბუქი მრეწველობის, სამშენებლო, სადისტრიბუციო და ფარმაცევტიკის სფეროს წარმომადგენლები. ღონისძიების პირველი პანელის ფარგლებში მონაწილეები სუამ-ის თავისუფალი სავაჭრო ზონის პერსპექტივებს განიხილავენ, მეორე პანელზე კი საუბარი სუამ-ის სატრანსპორტო დერეფნის შესახებ იქნება.

ვიზიტის ფარგლებში, სტუმრებს უკრაინის პრეზიდენტი პეტრო პოროშენკო და პრემიერ-მინისტრი ვლადიმირ გროისმანი უმასპინძლებენ.

საქართველოს პრემიერი უკრაინაში სამუშაო ვიზიტის ფარგლებში, ორმხრივ შეხვედრებს გამართავს უკრაინელ და მოლდოველ კოლეგებთან.