ტალღისებრი შეტევა პრეზიდენტზე - ,,ხელისუფლებაში მოსალოდნელია გადაადგილებები და ეს ადამიანები ვიღაცას თავს აწონებენ"

პოლიტიკა - 17:09, 24 Mar, 2017

3601

პრეზიდენტის ინსტიტუტის მისამართით უკანასკნელი დღეების მანძილზე მმართველი გუნდის რიგებიდან აქტიური ბრალდებები ისმის. მას შემდეგ რაც ე.წ. მოსმენების კანონთან დაკავშირებით პარლამენტს პრეზიდენტის მოტივირებული შენიშვნები გადაეგზავნა, უმრავლესობის დეპუტატები აცხადებენ, რომ პრეზიდენტი უმაღლეს საკანონმდებლო ორგანოს პირდაპირ არ უნდა მიუთითებდეს თუ რა შესწორებები უნდა შეიტანოს კანონში.

არსებულ სიტუაციას გუშინ გიორგი მარგველაშვილი ტელეკომპანია „მაესტროს“ პირდაპირ ეთერში გამოეხმაურა და მისი მისამართით გაჟღერებულ ბრალდებებს შოუ უწოდა. მან განაცხადა, რომ იგი ამ შოუში ჩართვას არ აპირებს, რადგან ეს ყოველივე ქვეყანაში არსებული სერიოზული პრობლემების გადაფარვის მცდელობაა.

„ნიუპოსტი“ სიტუაციის შესაფასებლად ექსპერტ გია ხუხაშვილს დაუკავშირდა, რომელმაც ჩვენთან საუბარში აღნიშნა, რომ ბრალდებები შესაძლოა მართლაც ისმოდეს პრობლემების გადასაფარად, მაგრამ არსებობს მრავალი მიზეზი, რის გამოც ხორციელდება ერთგვარი შეტევა პრეზიდენტის ინსტიტუტზე:

„ვფიქრობ, რომ ეს არის ერთ-ერთი მიზეზი იმისა თუ რატომ ხდება ეს საკმაოდ არაადეკვატური, უადგილო, უსაფუძვლო შეტევები პრეზიდენტზე. სხვა მიზეზებიც არსებობს, მაგრამ ერთ-ერთი მნიშვნელოვანი მიზეზი არის ის, რომ გადაიფაროს სხვა პრობლემები.

არ ვფიქრობ, რომ ეს შეტევები ვეტოს უფლების გამოყენებით იყოს გამოწვეული, რადგან მათთვის არ იყო მოულოდნელი, რომ პრეზიდენტი ვეტოს დაადებდა ამ კანონს, რომელიც მოწოდებული იმისკენ კი არ იყო, რომ ის ხარვეზი გამოესწორებინათ, არამედ მოწოდებული იყო იმისკენ, რომ გვერდი აევლოთ როგორმე საკონსტიტუციო სასამართლოს გადაწყვეტილებისთვის, ბუნებრივია მათ ეს მოლოდინი ჰქონდათ. მათი აქტივობა და შეტევა, ნაწილობრივ იმით არის გამოწვეული, რაც პრეზიდენტმა თქვა, ნაწილობრივ იმით, რომ ხელისუფლებაში გადაადგილებებია მოსალოდნელი და ეს ადამიანები, რომელბიც განსაკუთრებული სიმწვავით უტევენ პრეზიდენტს, მოლოდინი აქვთ, რომ პატარა პორტფელებს დიდი პორტფელებით შეცვლიან და ვიღაცას თავს აწონებენ და ეპრანჭებიან. ბევრი მიზეზია, ეს არ არის ახალი ისტორია, ასეთი ისტორიები ადრეც გვინახავს, ტალღისებრი შეტევები პრეზიდენტზე და კიდევ ერთხელ ვიხილეთ“, - განაცხადა გია ხუხაშვილმა.