თავდაცვისა და უშიშროების კომიტეტის სხდომაზე რეზერვის კონცეფციის პროექტზე მსჯელობენ, პროექტი თავდაცვის სამინისტროს წარმომადგენლებმა წარადგინეს. პროექტით განსაზღვრულია, რომ სამი კომპონენტი შეიქმნება. პროექტით ასევე განსაზღვრულია ის საკითხი, რომ საქართველოში სარეზერვო სამსახური ანაზღაურებადი იქნება, ამავდროულად ნებაყოფლობითი.

რეზერვისტები ორი სახის მომზადებას გაივლიან, საბრძოლო-ინტენსიურსა და სამობილიზაციო-მოკლევადიანს. კონცეფციის ავტორების განცხადებით, რეზერვისტთა შესაძლებლობები და პროფესიული უნარჩვევები სრულ თანხვედრაში იქნება შეიარაღებული ძალების პროფესიულ ქვედანაყოფებთან.

წვრთნების ხანგრძლივობა წელიწადში 45 დღეს არ აღემატება.

კონცეფციით განსაზღვრულია სპეციალისტების რეზერვის შექმნა, რომელიც ერთგვარი კიბერ სპეციალისტთა რეზერვი იქნება. ამ რეზერვში მყოფი ადამიანები გააგრძელებენ სამოქალაქო ცხოვრებას და ამავდროულად ჩარიცხულები იქნებიან რეზერვის სამსახურში.

„რეზერვისტები მთელი წლის მანძილზე პროფესიონალურ დონეზე იქნებიან აღრიცხული და გარკვეულ ხელფასსაც კი მიიღებენ, თუმცა წელიწადში, საერთო ჯამში 45 დღე იქნებიან გამოძახებული, მაქსიმალურად იქნებიან თანხვედრაში შეიარაღებული ძალების ქვედანაყოფებთან და იმ ცხოვრების წესთან, რასაც ჩვენი მუდმივი სამხედრო მოსამსახურეები ეწევიან. გარდა ამისა, ჩვენ გვეყოლება ტერიტორიული პრინციპით სამხედრო რეზერვი“, - განაცხადა ირაკლი სესიაშვილმა.