„ერთიანი ნაციონალური მოძრაობის“ წევრს გოგა ონიანს თბილისის მერი დავით ნარმანია პასუხოს. ნარმანია „ნაციონალურ მოძრაობას“ ახსენებს, რომ ავლაბრის მეტროს კედელზე ბაღი მათ დროს გაკეთდა და ამ პროექტის დროს „ბევრი ფული შეიჭამა“:

„გოგა ონიანს შევახსენებ, რომ ავლაბრის მეტროსთან კედელი მათი ხელისუფლების დროს არის გაკეთებული და თავის დროზე, ძალიან დიდი ფული შეიჭამა. ჩვენ იძულებული ვართ წელს ეს კედელი გამოვცვალოთ და აღვადგინოთ. ამიტომაც ბიუჯეტში გათვალისწინებული გვაქვს შესაბამისი დაფინანსება. თავის დროზე, უფრო ხარისხიანად რომ გაეკეთებინათ, მისი რამდენიმე წელიწადში ჩანაცვლება აღარ იქნებოდა საჭირო“, - განაცხადა დავით ნარმანიამ.

„ერთიანი ნაციონალური მოძრაობის“ პოლიტსაბჭოს წევრი გოგა ონიანი მერიას, 100 ათასობით ლარის არამიზნობრივად ხარჯვაში ადანაშაულებს.

"ავლაბრის მეტროსთან ვერტიკალური სკვერის გახმობასთან დაკავშირებით დედაქალაქის მერიამ 133 ათასის ღირებულების ტენდერი გამოაცხადა, რომელიც მის აღდგენას გულისხმობს. თუმცა, ამავდროულად გასათვალისწინებელია ის ფაქტორიც, რომ გასულ წელს მერიამ 100 ათასობით ლარი გადაიხადა მის მოვლაში. იმის ნაცვლად, რომ სწორედ ამ ტენდერში გამარჯვებული კომპანიისთვის დაესკისრებინა მისი აღდგენა’’ - განაცხადა გოგა ონიანმა.