მაია ბითაძე სამუშაო ვიზიტით იტალიაში იმყოფება

პოლიტიკა - 11:39, 24 Mar, 2017

1001

რომში, ორდღიანი ვიზიტის ფარგლებში, საქართველოს გარემოსა და ბუნებრივი რესურსების დაცვის მინისტრის მოადგილე მაია ბითაძე, როგორც ორჰუსის კონვენციის ბიუროს თავმჯდომარე, სიტყვით გამოვიდა ევროპული ECO ფორუმის მიერ ორგანიზებულ შეხვედრაზე. შეხვედრის ფარგლებში განიხილეს ორჰუსის კონვენციის როლი და მისი მნიშვნელობა ევროპული დემოკრატიის გაღრმავებაში.

შეხვედრის მიზანი იყო მთავრობების, საერთაშორისო სამთავრობო ორგანიზაციებისა და საერთაშორისო არასამთავრობო ორგანიზაციების წარმომადგენლებს შორის მოსაზრებების გაცვლა ორჰუსის კონვენციის ქმედითობასთან დაკავშირებით.

მაია ბითაძემ, სიტყვით გამოსვლისას, ისაუბრა ორჰუსის კონვენციის მნიშვნელობაზე, როგორც უმთავრეს საშუალებაზე, რომლის დებულებების ეროვნულ დონეზე ეფექტიანი იმპლემენტაცია უზრუნველყოფს გარემოსდაცვითი დემოკრატიის გაღრმავებას.

მაია ბითაძემ, ასევე, ისაუბრა ორჰუსის კონვენციის როლზე მდგრადი განვითარების მიზნების მიღწევაში. კერძოდ აღნიშნა, რომ ორჰუსის კონვენციით უზრუნველოფილი საზოგადოების გარემოსდაცვითი გადაწყვეტილების მიღების პროცესში მონაწილეობის უფლების ეფექტიან რეალიზებას მნიშვნელოვანი წვლილი შეუძლია შეიტანოს მდგრადი განვითარების მიზნების მიღწევაში.

მინისტრის მოადგილემ სიტყვით გამოსვლისას ხაზი გაუსვა, ამ კუთხით, საქართველოში განხორციელებულ ძალიან მნიშვნელოვან რეფორმას, კერძოდ ისაუბრა გარემოსდაცვითი შეფასების კოდექსის პროექტზე, რომელიც ძალაში შესვლის შემდგომ მნიშვნელოვან წვლილს შეიტანს, მათ შორის, ორჰუსის კონვენციის დებულებების ეროვნული დონეზე ეფექტიან იმპლემენტაციაში.

ვიზიტის ფარგლებში, მაია ბითაძემ მონაწილეობა მიიღო ასევე ორჰუსის კონვენციის შესრულების, იმპლემენტაციის და სხვა რეგიონებში გავრცელების შესახებ შეხვედრასა და რევოლუციური საინფორმაციო შესაძლებლობების მდგრადი განვითარების მიზნების მიღწევისთვის გამოყენების შესახებ დისკუსიებში.