პარლამენტის დელეგაცია ევრონესტის საპარლამენტო ასამბლეის კომიტეტების გაერთიანებულ სხდომაში მონაწილეობს

პოლიტიკა - 11:02, 24 Mar, 2017

607

საქართველოს პარლამენტის მუდმივმოქმედმა დელეგაციამ, რომელსაც ევროპასთან ინტეგრაციის კომიტეტის თავმჯდომარე თამარ ხულორდავა ხელმძღვანელობს, ბრიუსელში, ევრონესტის საპარლამენტო ასამბლეის პოლიტიკური და სოციალური კომიტეტების გაერთიანებულ სხდომაში მიიღო მონაწილეობა.

სხდომაზე ევროპასთან ინტეგრაციის კომიტეტის თავმჯდომარის მოადგილე, ბექა ნაცვლიშვილი ევრონესტის საპარლამენტო ასამბლეის სოციალურ საკითხთა კომიტეტის ვიცე თანათავმჯდომარედ აირჩიეს.

საქართველოს პარლამენტის დელეგაციის ხელმძღვანელი ევრონესტის საპარლამენტო ასამბლეის საქმიანობას მიესალმა და ევროპარლამენტისა და პარტნიორი პარლამენტების თანამშრომლობის მნიშვნელობას გაუსვა ხაზი.

სხდომაზე, აღმოსავლეთ ევროპაში შრომის ბაზარზე ქალების მდგომარეობის შესახებ ანგარიში განიხილეს. როგორც საქართველოს პარლამენტის წევრმა, გუგული მაღრაძემ გამოსვლაში აღნიშნა, გენდერული თანასწორობის გაძლიერებისთვის ეკონომიკურ საქმიანობაში ქალების ინტენსიური ჩართვაა საჭირო.

ბექა ნაცვლიშვილმა უთანასწორობის აღმოფხვრისა და ქალთა უფლებების რეალიზაციის მიზნით, ეკონომიკის სტრუქტურული გარდაქმნის აუცილებლობაზე ისაუბრა.სხდომაზე იმ პრობლემებსაც გაუსვეს ხაზი, რომლებიც ქალთა ეკონომიკურ აქტივობას აფერხებს.

პოლიტიკური და სოციალური კომიტეტების გაერთიანებულ სხდომაზე ევროკავშირსა და აღმოსავლეთ პარტნიორ ქვეყნებში მედიის თავისუფლების შესახებ ისაუბრეს.

საქართველოს პარლამენტის წევრებმა, სერგი კაპანაძემ და სალომე სამადაშვილმა სამაუწყებლო კომპანია “რუსთავი 2”-თან დაკავშირებულ საკითხზე გაამახვილესყურადღება.

თამარ ხულორდავამ სიტყვის თავისუფლებისა და მედიაპლურალიზმის კუთხით საქართველოს ხელისუფლების პრიორიტეტებზე ისაუბრა. მან პარტნიორებსსაქართველოს დემოკრატიული რეფორმების მიღწევები და ამოცანები კიდევ ერთხელ გააცნო და აღნიშნა, რომ ეს ქვეყნის ევროკავშირში გაწევრიანების საბოლოო მიზანს ემსახურება. როგორც თამარ ხულორდავამ განაცხადა, მედიასთან დაკავშირებული საკითხების პოლიტიზირება პროცესების გაუმჯობესებას არ ემსახურება. ევროპასთან ინტეგრაციის კომიტეტის თავმჯდომარემ კოლეგებს მოუწოდა, კონკრეტული სამართლებრივი დავის განხილვაში არ ჩაერთონ.

რეგიონში მედია თავისუფლების მიმოხილვისას, მოწვეულმა ექსპერტებმა აღნიშნეს, რომ მედიის თავისუფლების მდგომარეობისა და პლურალიზმის თვალსაზრისით, საქართველო მოწინავე პოზიციებს იკავებს.

დღევანდელ სხდომაზე მიმდინარე წელს დაგეგმილ აღმოსავლეთ პარტნიორობის სამიტზეც იმსჯელეს.

ევრონესტის საპარლამენტო ასამბლეის პოლიტიკური და სოციალური კომიტეტების გაერთიანებულ სხდომაში, დელეგაციის ხელმძღვანელთან, თამარ ხულორდავასთან ერთად, საქართველოს პარლამენტის მუდმივმოქმედი დელეგაციის წევრები, დიმიტრი ცქიტიშვილი, ბექა ნაცვლიშვილი, გუგული მაღრაძე, სერგი კაპანაძე და სალომე სამადაშვილი მონაწილეობენ.