საქართველოს პრეზიდენტის მოწვევით დღეს ეროვნული უშიშროების საბჭოს სხდომა გაიმართა. საქართველოს პრეზიდენტის გიორგი მარგველაშვილის განცხადებით, ეროვნული უშიშროების საბჭოს დღევანდელ სხდომაზე განიხილეს შავი ზღვის რეგიონში არსებული უსაფრთხოების გარემო, თავდაცვის სამინისტროში მიმდინარე რეფორმები და საქართველოს თავდაცვისუნარიანობის გაღრმავების გეგმები.

ჟურნალისტებთან საუბრისას საგარეო საქმეთა მინისტრის პირველმა მოადგილემ დავით დონდუამ განაცხადა, რომ სხდომის ფარგლებში განხილულ იქნა ნატო-ს დღისწესრიგი, რომელიც მიმდინარე წლის 25 მაისს არის ჩანიშნული:

„გასულ სამიტზე ვარშავაში, ნატომ მიიღო გადაწყვეტილება რომ გაააქტიუროს მუშაობა შავი ზღვის რეგიონში უსაფრთხოების უზრუნველყოფისთვის და ამ სტრატეგიულ დიალოგში ჩართო საქართველოც, ამ საკითხებზე ვისაუბრეთ, ვისაუბრეთ იმაზე თუ ჩვენ რა წვლილის შეტანა შეგვიძლია, ვისაუბრეთ ასევე ნატოს მომავალ დღისწესრიგზე, კერძოდ 25 მაისს გასამართ მაღალი დონის შეხვედრაზე, იმისათვის, რომ საქართველო იყოს სათანადოდ წარმოდგენილი“, - განაცხადა დავით დონდუამ.