საქართველოს პრეზიდენტის მოწვევით, საქართველოს ეროვნული უშიშროების საბჭოს სხდომა 2017 წლის 23 მარტს 17:00 საათზე, საქართველოს პრეზიდენტის რეზიდენციაში (თბილისი, მ.აბდუშელიშვილის ქ.1) გაიმართება. სხდომაზე მიწვევა უკვე მიღებული აქვთ საბჭოს მუდმივ წევრებს. სხდომაზე ელოდებიან პრემიერ-მინისტრსა და თავდაცვის მინისტრს. ჯერჯერობით უცნობია სხდომას დაესწრება თუ არა პარლამენტის თავმჯდომარე ირაკლი კობახიძე. ხვალ ჩანიშნულ სხდომა საგანგებო მოხსენება საგარეო საქმეთა მინისტრის მოადგილეს ექნება.

„განხილული იქნება რეგიონში შექმნილი უსაფრთხოების მდგომარეობა, ასევე საქართველოსა და ნატოს შორის არსებული პარტნიორობის ფორმატების შესაძლებლობები, შავი ზღვის რეგიონთან, უსაფრთხოების თემებთან დაკავშირებით, ასევე ის დიალოგი, რომელიც არის საქართველოსა და ნატო-ს შორის.

მოწვევა არის დაგზავნილი ყველასთან და ჩვენ იმედს ვიტოვებთ, რომ ეროვნული უსაფრთხოების თემები, რომლებიც ძალიან მნიშვნელოვანია, სწორედ რეგიონში შექმნილი რთული ვითარებიდან გამომდინარე, უყურადღებოდ არ დარჩება და მასში მონაწილეობას მიირებენ მუდმივი წევრები, მათი შესაძლებლობებიდან გამომდინარე, რამდენად იქნებიან ისინი თბილისში ამ დროს“, - განაცხადა საქართველოს ეროვნული უშიშროების საბჭოს მდივნის მოადგილემ, ვანო მაჭავარიანმა.