ბოლნისის გავლით რუსული სატვირთოები მოძრაობენ, რომლებსაც მძიმე ტექნიკა გადააქვთ

ბოლნისის გავლით რუსული სატვირთოები მოძრაობენ, რომლებსაც მძიმე ტექნიკა გადააქვთ - ენმ-ს განცხადება

პოლიტიკა - 17:56, 22 Mar, 2017

30703

„ერთიანი ნაციონალური მოძრაობის“ ინფორმაციით, საქართველოს ტერიტორიაზე, ბოლნისის რაიონის გავლით რუსული სანომრე ნიშნების მქონე სატვირთო მანქანებით მძიმე ტექნიკა გადააქვთ.

განცხადება ცოტა ხნის წინ ენმ-ს ერთ-ერთმა ლიდერმა ნუგზარ წიკლაურმა გააკეთა. ოპოზიცია ხელისუფლებისგან რეაგირებას ითხოვს.

"ამ წუთებში, ბოლნისის რაიონში რუსული სანომრე ნიშნებით სატვირთო ავტომობილები გადაადგილდება, რომლებსაც შეფუთული და უცხო თვალისთვის შენიღბული ტვირთი გადააქვთ. ვიზუალური დაკვირვებით და დიდი ალბათობით, ეს არის მძიმე მუხლუხოიანი ტექნიკა. სავარაუდოდ, სამხედრო დანიშნულების. ამის დამადასტურებელი ფოტო და ვიდეო მასალა ზუსტად ერთი წუთის წინადგილიდან მივიღეთ. პირველ რიგში, გვინდა მივმართოთ პრეზიდენტს და ხელისუფლებას, სასწრაფოდ გამოიკვლიონ, თუ რა დანიშნულებისაა ეს ტვირთი. ჩვენი რამდენიმე მეგობარი, რომელიც ამ წუთებში იქ იმყოფება, გვეუბნება, რომ ეს უდიდესი ალბათობით, არის სამხედრო ტექნიკა. ხვალ არის უშიშროების საბჭოს სხდომა და ვფიქრობთ, აუცილებელია ამ საკითხის დაყენება. ტვირთი სავარაუდოდ, სომხეთის საზღვრისკენ გადაადგილდება" - განაცხადა ნუგზარ წიკლაურმა.

ამასთან, სომხური მედია ავრცელებს ინფორმაციას, რომ სომხეთის ეროვნული უსაფრთხოების სამსახურის თანამშრომლებმა საქართველოდან სომხეთში იარაღის კონტრაბანდის ფაქტი გამოავლინეს.

როგორც უწყება აცხადებს, აღნიშნული კონტრბანდული იარაღის ქვეყანაში მოსალოდნელი შეტანის შესახებ ინფორმაცია უსაფრთხოების სამსახურში მიმდინარე მარტის თვეში შევიდა, ოპერატიულ-სამძებრო მოქმედებების შედეგად აღნიშნული დანაშაული აღკვეთილი იქნა და კონფისკაცია გაუკეთდა საზენიტო-სარაკეტო კომპლექს „იგლა“-ს.

ფაქტზე აღძრულია საქმე სომხეთის სისხლის სამართლის კოდექსის 235-ე მუხლის მიხედვით, რაც ჯგუფის მიერ იარაღის უკანონო შეძენის, გაყიდვის, შენახვას ან ფლობას გულისხმობს. დანაშუალის ჩადენისთვის დაკავებულია 2 პირი , მიმდინარეობს გამოძიება იარაღით უკანონო ვაჭრობასთან კავშირში მყოფი სხვა პირების გამოსავლენად.