სამხედრო ატაშეები საქართველოს თავდაცვის უწყების რეფორმას მხარდაჭერას უცხადებენ

პოლიტიკა - 13:33, 22 Mar, 2017

1028

საქართველოს თავდაცვის უწყებაში განხორციელებული რეფორმები, შეიარაღებულ ძალებში მიმდინარე ტრანსფორმაციის პროცესი და სამომავლო გეგმები ის ძირითადი საკითხები იყო, რაც საქართველოს თავდაცვის მინისტრმა სამხედრო ატაშეების ასოციაციის წარმომადგენლებს გააცნო. შეხვედრა საქართველოში აკრედიტებული თავდაცვის ატაშეების ასოციაციის წლიური გეგმის ფარგლებში გაიმართა. შეხვედრაზე საუბარი შეეხო ასევე, ახალი სტრატეგიული მიმოხილვის დოკუმენტს (SDR) და იმ ძირითად სტრატეგიულ მიმართულებებს, რომელიც დოკუმენტშია ასახული. „სტრატეგიული მიმოხილვის დოკუმენტი 2017-2020“ ოთხი წლის განმავლობაში თავდაცვის სამინისტროს სახელმძღვანელო დოკუმენტი იქნება, რომელიც საქართველოს თავდაცვის სამინისტროსა და შეიარაღებულ ძალებში განვითარების ძირითად მიმართულებებს განსაზღვარს და მიზნად საქართველოს შეიარაღებული ძალების შესაძლებლობების გაზრდასა და ნატოსთან თავსებადობის ამაღლებას ისახავს.

სამხედრო ატაშეებმა თავდაცვის უწყების ხელმძღვანელ პირებთან შეხვედრა დადებითად შეაფასეს, მხარდაჭერა კიდევ ერთხელ გამოხატეს და თავდაცვის სფეროში ინტენსიური თანამშრომლობის გაგრძელების იმედი გამოთქვეს.

დიპლომატიური კორპუსის წარმომადგენლებს მინისტრთან ერთად მისმა პირველმა მოადგილემ ლელა ჩიქოვანმა, გენერალური შტაბის უფროსმა, ბრიგადის გენერალმა ვლადიმერ ჩაჩიბაიამ და მისმა პირველმა მოადგილემ, პოლკოვნიკმა ნიკოლოზ ჯანჯღავამ უმასპინძლეს. შეხვედრას ნატო-საქართველოს არსებითი პაკეტის (SNGP) ძირითადი ჯგუფისა და გენერალური შტაბის სხვა წარმომადგენლები დაესწრნენ.

სამხედრო ატაშეების ასოციაცია 24 ქვეყნის წარმომადგენელს აერთიანებს. ატაშეების გაერთიანების მიზანია, საქართველოს უსაფრთხოების სისტემაში მიმდინარე რეფორმების შესახებ ინფორმაციის პირველწყაროდან მიღება. სამხედრო ატაშეები საქართველოს სამხედრო უწყებასთან ორმხრივი სამხედრო გეგმის ფარგლებში თანამშრომლობენ.