უზენაესი სასამართლოსგან განმარტებებს ელოდება ოპოზიცია და არ გამორიცხავს იმას, რომ მართლაც შეიცვალა დიდი პალატის დაკომპლექტების თარიღი. მათი განცხადებით ხელისუფლება ცდილობს შეასრულოს ივანიშვილის დაკვეთები და ნებისმიერი ფორმით შეცვალოს რუსთავი 2-ის სარედაქციო პოლიტიკა.

არასამთავრობო ორგანიზაციები კი ფიქრობენ, რომ სასამართლოს მიერ სამ დღეში მიღებული გადაწყვეტილების გამართლებას, სასამართლო სისტემა თარიღის შეცვლით ცდილობს. იმ შემთხვევაში კი თუ მოსამართლეები მართლაც სამი თვით ადრე შეიკრიბნენ, უზენაესმა სასამართლომ ესეც უნდა განმარტოს, რატომ დაუმალა ინფორმაცია მხარეებსა და მესამე სექტორს.

მათი შეფასებით, თუ დადასტურდა, რომ თარიღი გაყალბებულია, ის არა მხოლოდ სასამართლოს, არამედ ქვეყნის იმიჯსაც საფრთხეს შეუქმნის.

„სავარაუდოდ ეს არის მტკიცებულებების გაყალბება, მტკიცებულებების გადაკეთება, გადანომრვასთან, რაც იმაზე მიუთითებს, რომ მათ იმდენად შეეშინდათ სტრასბურგის სასამართლოს მხრიდან პრეცედენტის გამოტანის, რომ სახეზე გვაქვს კონვენციის მე-6 მუხლის დარღვევა, სამართლიანი სასამართლოს უფლების დარღვევა რუსთავი 2-თან მიმართებაში და ხელისუფლება ცდილობს რამენაირად შეალამაზოს ე.წ. სასამართლოს სახე,“-განაცხადა ზაზა ხატიაშვილმა.