"ამან შეიძლება მის რეპუტაციაზე უარყოფითად იმოქმედოს" - ჯეჯელავა პრეზიდენტის ვეტოს აფასებს

პოლიტიკა - 16:22, 21 Mar, 2017

2970

ვიცე-პრემიერმა, განათლებისა და მეცნიერების მინისტრი ალექსანდრე ჯეჯელავამ ე.წ. მოსმენების კანონზე პრეზიდენტის მიერ ვეტოს დადებას გამოეხმაურა.
მინისტრს ეჩვენება, რომ "პრეზიდენტის მიერ ვეტოს უფლების გამოყენება ზედმეტად ხშირად ხდება, რამაც საზოგადოების თვალში ცოტათი ფასი შეუმცირა ამ ვეტოს".
”რაღაცნაირი ყოველდღიურობის ნაწილი გახდა, რომ პრეზიდენტი ვეტოს დაადებს ისეთ კანონს, რომლის შესახებაც კონსულტაციებში ან იყო ჩართული, ზოგ შემთხვევაში აქტიურად, ზოგ შემთხვევაში კი არ ყოფილა აქტიურად ჩართული და მერე ეს ვეტო დაიძლევა. ვფიქრობ, ვეტოს და თვითონ პრეზიდენტის რეპუტაციაზე ეს შეიძლება უარყოფითად მოქმედებდეს და ამ გაგებით ეს კარგი არ არის. რაც შეეხება კონკრეტულად ე.წ. მოსმენების შესახებ კანონს, მისი ახლანდელი ფორმულირება მე ვფიქრობ, არის ადეკვატური დროის მოთხოვნებსა და საჭიროებების მხრივ. ძალიან ბევრი სწორი ცვლილება შევიდა ამ მიმართულებით და ეს იქნება წინგადადგმული ნაბიჯი. ეს ისედაც ცნობილია, რომ ჩვენი ხელისუფლების პირობებში არასანქცირებული, უკანონო მოსმენების დამტკიცებული შემთხვევები ძალიან ცოტაა - გაცილებით ნაკლებია, ვიდრე ეს ადრე იყო და ამიტომ, შიშის და წუხილის საფუძველი ნაკლებია”,- განაცხადა ალექსანდრე ჯეჯელავამ.