საქართველოს პარლამენტის იურიდიულ საკითხთა კომიტეტის სხდომაზე პრეზიდენტის ვეტოს განხილვა დღეიდან იწყება. „ქართული ოცნება“ გიორგი მარგველაშვილის შენიშვნებს არგუმენტირებულად არ მიიჩნევს და ვეტოს დასაძლევად ემზადება.

პრეზიდენტის შენიშვნებსა და მოსაზრებებს იზიარებენ საპარლამენტო ოპოზიციის რიგებში. „ევროპული საქართველოს“ რიგებში მიაჩნიათ, რომ მოსმენების მთავარი გასაღები სახელმწიფო უსაფრთხოების სამსახურის ხელში არ უნდა იყოს:

„ჩვენ ახალი რეალობის წინაშე ვდგებით, როდესაც საკონსტიტუციო სასამართლოს გადაწყვეტილება ირღვევა და პარლამენტი მოქმედებს კონსტიტუციური წესრიგის საწინააღმდეგოდ,“ - აცხადებს ოთარ კახიძე.

„ნაციონალური მოძრაობა“ კი დარწმუნებულია, რომ ხელისუფლება სისტემის სრულად გასაკონტროლებლად ყველაფერს გააკეთებს:

„დავუჭერთ მხარს პრეზიდენტის ვეტოს და კიდევ ერთხელ გავაფრთხილებთ პარლამენტს, რომ ისევ მესამედ არ მოუწიოთ ამ კანონზე მსჯელობა და თუკი რაიმე პასუხისმგებლობა აქვთ კანონისა და საზოგადოების წინაშე, უბრალოდ უნდა შერცხვეთ,“ - აცხადებს რომან გოცირიძე.