"სასამართლო ეკა ბესელიას ქუსლის ქვეშ არის გათელილი" - ელისაშვილი სასამართლოს გადაწყვეტილებას სააპელაციოში გაასაჩივრებს

პოლიტიკა - 16:29, 20 Mar, 2017

3603

საკრებულოს დამოუკიდებელი დეპუტატი ალეკო ელისაშვილი თბილისის საქალაქო სასამართლოს გადაწყვეტილებას, რომლის მიხედვითაც სასამართლომ ეკა ბესელიას სარჩელი ალეკო ელისაშვილის წინააღმდეგ ნაწილობრივ დააკმაყოფილა "ნიუპოსტთან" გამოეხმაურა.

დეპუტატის თქმით, საქალაქო სასამართლოს გადაწყვეტილებას ჯერ სააპელაციოში შემდეგ უზენაესში ბოლოს კი თუ საჭირო იქნება სტრასბურგის სასამართლოში გაასაჩივრებს.

ოპოზიციის წევრი ადამიანის უფლებათა დაცვის კომიტეტის თავმჯდომარეს მექრთამეს უწოდებს.

ელისაშვილის განცხადებით, ხელისუფლებას სურს კრიტიკულად განწყობილი მოქალაქეები მის მაგალითზე დააშინოს.

"20-დან 30 დღემდე ვადაში უნდა ჩამბარდეს ის გადაწყვეტილება რაც იბოდიალა დღეს, ჩვენი სასამართლოს სამარცხვინო მოსამართლემ, ქეთევან კუჭავამ. გადაწყვეტილება როგორც კი ჩამბარდება სააპელაციო სასამართლოში გავასაჩივრებ. რაც შეეხება გადაწყვეტილების შეფასებით ნაწილს: მურუსიძე, ნაზღაიძე, ურთმელიძის სულიერი ამხანაგია ეს მოსამართლე. ზოგადად ძალიან გულდასაწყვეტია, რომ სასამართლო ეკა ბესელიას და ხელისუფლების ქუსლის ქვეშ არის გათელილი.

"ქართულ ოცნებას" უნდა ჩემი სახით შეაშინოს და უკან დაახევინოს იმ ხალხს, ვინც გაბედავს და მმართველი გუნდის მექრთამეების წინააღმდეგ ხმას ამოიღებს. ეკა ბესელია, რომ მექრთამეა და ფულს ყველა დროს ყველაფერზე აკეთებდა ეს ყველამ კარგად იცის. ვინმე თუ გაბედავს მხილებას ჩემი მაგალითით ეტყვიან, რომ აი პროკურატურა შენს წინააღმდეგ წავა, სასამართლოში სამართალს ვერ იპოვი... უნდათ მეც უკან დამახევინონ - ვერ მივართვი ჩემო ბატონო. პირიქით, ჩემს პოზიციაში უფრო მტკიცედ ვარ და ერთი ნაბიჯის უკან დახევას არ ვაპირებ. მე როგორც კანონდამცავი ადამიანი, ჯერ გავასაჩივრებ ამ გადაწყვეტილებას სააპელაციოში, შემდეგ უზენაესში და არც სტრასბურგში დამეზარება წასვლა.

გულდასაწყვეტია, რომ ქართული ოცნების მორალური სახე ეკა ბესელია გახდა. თუ გვინდა გავიგოთ როგორია ქართული ოცნება -შევხედოთ ეკა ბესელიას. ბიძინა ივანიშვილის სახეა სინამდვილეში ბესელია, ვულოცავ მათ ასე დეგრადირებას და ასეთად ჩამოყალიბებებას"- განუცხადა "ნიუპოსტს" ალეკო ელისაშვილმა.

თბილისის საქალაქო სასამართლომ ნაწილობრივ დააკმაყოფილა პარლამენტის დეპუტატის ეკა ბესელიას სარჩელი საკრებულოს დეპუტატის ალეკო ელისაშვილის წინააღმდეგ. ალეკო ელისაშვილს სასამართლომ დააკისრა ეკა ბესელიასთან დაკავშირებიტ გაკეთებული განცხადების „რუსთავი2“-ის ეთერში უარყოფა და 1000 ლარის ჯარიმა.

როგორც ცნობილია, ჯარიმის თანხის გადარიცხვას კომიტეტის თავმჯდომარე მზრუნველობამოკლებული ბავშვების დახმარების ფონდში აპირებს.