პრეზიდენტმა ე.წ მოსმენების კანონს ვეტო დაადო

პოლიტიკა - 15:03, 20 Mar, 2017

1634

საქართველოს პრეზიდენტმა გიორგი მარგველაშვილმა ე.წ ფარული მოსმენების საკანონმდებლო პაკეტს ვეტო დაადო. ამასთან დაკავშირებით განცხადება პრეზიდენტმა დღეს გამართულ ბრიფინგზე გააკეთა. მარგველაშვილის თქმით ის პარლამენტს ე.წ მოსმენების შესახებ კანონპროექტს მოტივირებული შენიშვნებით უკან უბრუნებს.

„კანონპროექტის ამ პაკეტში არის რიგი საკამათო საკითხებისა, კონსტულტაციების შედეგად გამოიკვეთა ორი ძირითადი ხარვეზი პირველი არის სააგენტოს დამოუკიდებლობა, რომელიც წარმოდგენილი კანონპროექტით არ არის უზრუნველყოფილი, შესაბამისად, ეწინააღმდეგება საკონსტიტუციო სასამართლოს გადაწყვეტილებას, მეორე არის კანოპროექტში გაუმართლებელი და არაპროგნოზირებადი ხარჯები, რომელიც ეს კანონპროექტის საკომუნიკაციო კომპანიებს აკისრებს.“- განაცხადა გიორგი მარგველაშვილმა.

პრეზიდენტმა ვეტოების ისტორიაც მიმოიხილა და აღნიშნა, რომ ადრე თუ გვიან ხელისუფლებას მოუხდა იმ შენიშვნების გათვალისწინება, რომელსაც ის ვეტოს დადების არგუენტად იყენებდა,

„2014 წლის 29 ნოემბერს მე იგივე კანონზე გამოვიყენე ვეტოს უფლება და მაშინ საპარლამენტო უმრავლესობამ დიდი ზარზეიმით ამცნო საზოგადოებას, რომ მათ დაძლიეს ვეტო, მალე საკონსტიტუციო სასამართლომ გააჩერა ეს კანონპროექტი. საზოგადოებას მინდა გავახსენო ვეტოების ისტორია, მე ვეტო ეროვნული ბანკის კანონპროექტთან დაკავშირებითაც გამოვიყენე და სულ რამდენიმე დღეში მოგვივა ახალი კანონპროექტი ხელმოსაწერად, რომელიც სიტყვასიტყვით იმეორებს იმ პოზიციებს, რომელიც მე მქონდა ვეტოში დაფიქსირებული, მაშინაც საპარლამენტო უმრავლესობამ იმ ვეტოსდ დაძლევა დიდ წარმატებად ამცნო საზოგადოებას. მიმდინარე წელს 25 იანვარს საერთო სასამართლოების შესახებ გამოვიყენე ვეტო და 15 თებერვალს ამ კანონთან მიმართებაში საკონსტიტუციო სასამართლომ გააჩერა ის ერთ-ერთი მუხლი, რომელიც მე მქონდა მითითებული. საზოგადოებას შეუძლია ადევნოს თვალი ვეტოების ისტორიას და იმ შედეგებს, რომელსაც არამარტო საპარლამენტო უმრავლესობა, არამედ ქვეყანა იღებს ამ ვეტოების დაძლევის პრაქტიკიდან გამომომდინარე“- აღნიშნა პრეზიდენტმა.