,,ჩვენ გვრჩება ტალახი და გავერანებული ტერიტორია" - ივანიშვილის ხეები და მოსახლეობის პროტესტი

პოლიტიკა - 18:42, 19 Mar, 2017

6771

ბიძინა ივანიშვილმა გურიიდან თავის დენდროლოგიურ პარკში რამდენიმე ასწლოვანი ხე გადაიტანა. სხვადასხვა ჯიშის საუკუნოვანი ხეები, მან ძირითადად ნატანებიდან (ოზურგეთის მუნიციპალიტეტი) წაიღო. რამდენიმე ადგილობრივიდან ასწლოვან მუხასა და წიფელში ივანიშვილმა რამდენიმე ათასი ლარიც გადაიხადა. თუმცა, გარდა ხეებისა, მას თანხის გადახდა მოუხდა ერთ-ერთი ადგილობრივისთვის, იმის გამო, რომ ხეების გადასაზიდად საჭირო დროებითი გზა მის საყანე ფართობში უნდა გაეყვანათ: "ც. ნანობაშვილის საყანე ფართობში გაიყვანეს დროებითი გზა, რადგან სხვა მხრივ სურმავასგან (ნატანებელი პედაგოგი, რომლისგანაც 250 წლის ხე შეიძინა 15 ათას ლარად) ნაყიდი ხის ტრანპორტირებას ვერ ახერხებდნენ. 5 ათასი ლარი გადაუხადა ნანობაშვილებს ამის გამო-გვეუბნებიან ადგილობრივები.

ისინი უკმაყოფილებას გამოთქვამენ იმის გამო, რომ ტერიტორია, სადაც ხეეები ითხრება საშინლად ატალახებული და გადათხრილია. "ყოფილი ჩაის ფაბრიკის ტერიტორიიდან სამი ასწლოვანი ხე წაიღეს. ნახეთ, გადათხრილი და აოხრებულია იქაურობა. თავის საქმეს მორჩებიან, დაგებულ ბილიკებს ამოყრიან და ჩვენ გვრჩება ტალახი და გავერანებული ტერიტორია. სულ ატალახებულია ყველაფერი. ვეღარ გაივლი იმ ტერიტორიაზე. გაუბედურებულია ყველაფერი"-გვეუბნებიან ნატანებლები. გარდა ამისა, ადგილობრივებს პროტესტი აქვთ იმასთან დაკავშირებითაც, რომ ხეების გადატანის პროცესში ასობით აბონენტს საათობით ეთიშებათ ელექტროენერგია. გუშინ კი ნატანებიდან წვერმაღალამდე რამდენიმე ათეულ მეტრზე გაზის მილები გადაჭრეს.