ტრაგიკული შემთხვევა კობში - რა ვითარებაში დაიღუპა უცხოელი ტურისტი

შემთხვევა - 14:18, 17 Mar, 2017

3268

კობში ჩამოწოლილ ზვავს უცხოელი ტურისტი ემსხვერპლა. ადგილიდან მისი ვერტმფრენით გადმოყვანა „ჰელისკი ჯორჯიამ“ უზრუნველყო. როგორც კომპანიის წარმომადგენელმა ვახტანგ ასათიშვილმა „იმედთან“ საუბრისას განაცხადა ტურისტების ჯგუფი დაახლოებით 8 ადამიანისგან შედგებოდა და ისინი აღნიშნულ ტერიტორიაზე სავარაუდოდ დამოუკიდებლად, გამყოლის გარეშე იყვნენ ასულები:

„კობის რეგიონში ზვავი იყო ჩამოწოლილი და ჯგუფი იყო ზვავში მოყოლილი. ჯგუფის წევრებს უკვე ზვავიდან ამოყვანილი ჰყავდათ დაშავებული და ხელოვნურ სუნთქვას უტარებდნენ, ვერტმფრენში ჩავსვით და გუდაურში გადავიყვანეთ, დახლოებით 6-8 კაციანი ჯგუფი. ზვავის სიღმე დაახლოებით 2-2,5 მეტრი იყო. ამ დროისთვის არის ახალი თოვლი და ზვავსაშიშროება მაღალია. ეს ჯგუფი დამოუკიდებლად სრიალებდა. დანარჩენი ჯგუფის წევრები უკვე ჩამოსულები არიან აღნიშნული ტერიტორიიდან“- განაცხადა ასათიშვილმა.

შინაგან საქმეთა სამინისტრო ყაზბეგში უცხოელი ტურისტის გარდაცვალების ფაქტს ადასტურებს. როგორც "ნიუპოსტს" შსს-ში განუცხადეს, მომხდარზე გამოძიება დაიწყო.

უწყების ინფორმაციით, ტურისტები გადავიდნენ აკრძალულ ადგილზე, სათხილამურო ტრასის მიღმა გაუკვალავ ტერიტორიაზე, სადაც ზვავი ჩამოწვა და ერთი ადამიანის სიცოცხლე იმსხვერპლა.