ადამიანის უფლებები და სასამართლო- საკონსტიტუციო კომისია დღეს მორიგ შეხვედრას მართავს

პოლიტიკა - 10:52, 17 Mar, 2017

1077

ადამიანის ძირითადი უფლებებისა და თავისუფლებების, სასამართლო ხელისუფლების, საქართველოს კონსტიტუციის პრეამბულისა და ზოგადი და გარდამავალი დებულებების საკითხთა სამუშაო ჯგუფის შეხვედრაზე დღეს ადამიანის უფლებებისა და სასამართლო ხელისუფლებასთან დაკავშირებულ საკითხებზე იმსჯელებენ.

შეხვედრაზე სასამართლო ხელისუფლების ფორმირებასთან დაკავშირებით ინიციატივით გამოსვლას გეგმავს კონსტიტუციონალისტი ვახტანგ ხმალაძე, მისი თქმით, ეს შეეხება სასამართლო უფლებამოსილების გაფართოებას და ასევე აპირებს სამუშაო შეხვედრაზე მოსამართლეთა კარიერული წინსვლის საკითხი დააყენოს.

„მე ვფიქრობ რომ დავსვა საკითხი მოსამართლეთა კარიერული წინსვლისა. რაც გულისხმობს იმას, რომ სააპელაციო სასამართლოს მოსამართლედ შეიძლება დაინიშნოს მხოლოდ ის პირი, რომელიც პირველი ინსტანციის სასამართლოში მოსამართლედ მუშაობდა სულ ცოტა 3-4 წლის განმავლობაში“- განაცხადა ვახტანგ ხმალაძემ.

კონსტიტუციონალისტმა ვახუშტი მენაბდემ სახალხო დამცველის საკითხზე გააკეთა აქცენტი, მისი თქმით ომბუდსმენის შესახებ კონსტიტუციურმა ნორმამ უნდა უზრუნველყოს ის რომ სახალხო დამცველი იყოს მაღალი დამოუკიდებლობის, პოლიტიკურ ძალებს შორის კონსენსუსის წესით არჩეული თანამდებობის პირი:

„აქტუალური საკითხი ეს იქნება სახალხო დამცველის შესახებ კონსტიტუციური ნორმა, რომლის მიხედვითაც ჩვენ ვცდილობთ რომ ეს იყოს მაღალი დამოუკიდებლობის, პოლიტიკურ ძალებს შორის კონსენსუსის წესით არჩეული თანამდებობის პირი“- განაცხადა ვახუშტი მენაბდემ.

„ერთიანი ნაციონალური მოძრაობის“ წევრის აკო მინაშვილის შეფასებით, მმართველი გუნდის მიერ კონსტიტუციის გადასინჯვის მიზანს წარმოადგენს ის, რომ მათ კონსტიტუციაც და საერთოდ კანონმდებლობაც საკუთარ თავზე მოირგონ:

„ქართული ოცნება არაა ორიენტირებული ადამიანის უფლებების დაცვაზე და სახელმწიფოზე, მათი მთავარი მიზანია, რომ კონსტიტუციაც და საერთოდ კანონმდებლობაც მოირგონ საკუთარი თავზე. მთელი 4 წლის განმავლობაში მათი საქმიანობა არ ემსახურება დემოკრატიის ან ადამიანის უფლებების განვითარების საქმეს“- აღნიშნა აკო მინაშვილმა.

„მოძრაობა თავისუფლებისათვის- ევროპული საქართველოს“ წევრის გიორგი ტუღუშის თქმით უმნიშვნელოვანესია, რომ ადამიანის უფლებების და სასამართლოს განვითარებასთან მიმართებაში არ მოხდეს კონსტიტუციაში უკვე არსებული სტანდარტის დაბლა დაწევა:

„რაც შეეხება უშუალოდ ადამიანის უფლებებს და სასამართლოს განვითარებას, ჩვენთვის მნიშვნელოვანია, რომ არ მოხდეს არსებული სტანდარტის დადაბლება, ჩვენ ვეწინააღმდეგებით კონსტიტუციაში ათასგვარი უაზრო ჩანაწერის გაჩენას, რომელიც რეალურად არანაირ ლეგიტიმურ მიზანს არ ემსახურება.“- აღნიშნა გიორგი ტუღუშმა.