პრეზიდენტის არჩევის წესი - რა წინადადებებს განიხილავს საკონსტიტუციო კომისია

პოლიტიკა - 15:33, 16 Mar, 2017

1427

საკონსტიტუციო კომისია პრეზიდენტის უფლებამოსილების შესახებ მსჯელობს. „ქართულ ოცნებაში“ აცხადებენ, რომ პრეზიდენტის არჩევნები 2018 წელს ამჟამად არსებული კანონმდებლობით ჩატარდება. შემდეგში კი პრეზიდენტი საკანონმდებლო ორგანომ უნდა აირჩიოს, საუბარი იყო იმ წესზეც, რომლის მიხედვითაც სახელმწიფოს მეთაურს პარლამენტის წევრების გარდა, ადგილობრივი თვითმმართველობების წარმომადგენლებიც აირჩევენ. აღნიშნული ვერსია საკონსტიტუციო კომისიას ვახტანგ ხმალაძემ შესათავაზა. ხმალაძის წინადადებაა, რომ ამომრჩეველთა კოლეგია დაკომპლექტდეს პარლამენტის 150 წევრისგან და 150 დელეგატისაგან, რომლებსაც აფხაზეთისა და აჭარის უმაღლესი საბჭოები და საკრებულოთა გაერთიანებები აირჩევენ იმ პროპორციით, როგორი პროპორციითაც ამ საკრებულოებში სხვადასხვა პოლიტიკური პარტიები იქნებიან წარმოდგენილნი. ვახტანგ ხმალაძის თქმით, საკონსტიტუციო კომისიის დღევანდელ სხდომაზე მის წინადადებაზე კენჭისყრა არ გამართულა, რადგან სამუშაო ჯგუფის არაერთმა წევრმა იგი არ გაიზიარა.

სახელმწიფო საკონსტიტუციო კომისიაში უმრავლესობის მიერ წარდგენილია საკონსტიტუციო ცვლილებების სამუშაო ვარიანტი, რომლის გათვალისწინებით, პრეზიდენტის არჩევა პარლამენტის მიერ - სრული შემადგენლობის უმრავლესობით ხდება.

საქართველოს კონსტიტუციის გადასინჯვის მიზნით, სახელმწიფო საკონსტიტუციო კომისია 15 დეკემბერს შეიქმნა, რომლის ფარგლებში ოთხი თემატური სამუშაო ჯგუფი მუშაობს. კომისიამ საქართველოს კონსტიტუციის გადასინჯვის კანონპროექტი 2017 წლის 30 აპრილამდე უნდა შეიმუშაოს.