საკონსტიტუციო კომისია პრეზიდენტის უფლებამოსილების და არჩევის წესზე იმსჯელებს

პოლიტიკა - 10:20, 16 Mar, 2017

1187

პარლამენტში დღეს სახელმწიფო საკონსტიტუციო კომისიის - საქართველოს პრეზიდენტის, საქართველოს მთავრობისა და თავდაცვის საკითხთა სამუშაო ჯგუფის შეხვედრა გაიმართება. ჯგუფის წევრები პრეზიდენტის უფლებამოსილების და არჩევის წესზე ისაუბრებენ.

მმართველი გუნდის განმარტებით, მიღებულია გადაწყვეტილება რომ 2018 წელს პრეზიდენტი პირდაპირი წესით იქნეს არჩეული, მომდევნო არჩევნები კი საპარლამენტო რესპუბლიკის შესაბამისი ფორმით ჩატარდება. უმრავლესობის ინიციატივით, პრეზიდენტს შესაძლოა, შეწყალების კანონზე ვეტოს დადებისა და ორმაგ მოქალაქეობის მინიჭების უფლებამოსილებაზე პრემიერის თანხმობა დასჭირდეს. ახალი შეთავაზებით, პრეზიდენტს კონტრასიგნაციის გარეშე მხოლოდ არჩევნებში გამარჯვებული პარტიის პრემიერობის კანდიდატის წარდგენის, პარლამენტის დათხოვნის და საკუთარი ადმინისტრაციის თანამშრომლების დანიშვნის უფლებამოსილება რჩება. პრეზიდენტის უფლებების შეკვეცის ჩამონათვალშია უშიშროების საბჭოს გაუქმების საკითხიც.

პრეზიდენტის არჩევის წესის ცვლილებასა და უფლებამოსილების შესაძლო შეზღუდვას ეწინააღმდეგება საპარლამენტო ოპოზიცია, მათი თქმით ეს იმისთვის კეთდება, რომ ივანიშვილმა გავლენა ყველა სახელმწიფო ინსტიტუციაზე მოიპოვოს.

პრეზიდენტის არჩევის წესის შეცვლასა და მისი უფლებების შეკვეცას კატეგორიულად ეწინააღმდეგება სამოქალაქო სექტორი.

საკონსტიტუციო კომისიაში ჩართული არასამთავრობო ორგანიზაციების აზრით, შექმნილ ვითარებაში საქართველოს პრეზიდენტს შეკვეცის ნაცვლად უფლებამოსილება უნდა გაიზარდოს. იმ შემთხვევაში, თუ განსხვავებული აზრი სამომავლოდ არ იქნება გათვალისწინებული, არასამთავრობო ორგანიზაციები მომავალში საკონსტიტუციო კომისიის დატოვებას არ გამორიცხავენ.