ადამიანის უფლებათა დაცვის კომიტეტზე პერსონალურ მონაცემთა დაცვის ინსპექტორის ანგარიშის მოსმენისას დეპუტატებს შორის კამათი მოხდა. ერთიანი ნაციონალური მოძრაობის წევრს რომან გოცირიძეს შეკითხვა იმ მოსმენების რაოდენობასთან დაკავშირებით გაუჩნდა, რომელიც სასამართლოს ნებართვით განხორციელდა.:

„315 ადამიანს ამ დარბაზში, ამ შენობაში უსმენენ მხოლოდ და თქვენ გვეუბნებით, რომ 315 მოსმენა განხორციელდა 2016 წელს?“ - განაცხადა რომან გოცირიძემ.

მას ამ საკითხზე პარლამენტის ფრაქცია ქართული ოცნების წევრი, ანრი ოხანაშვილი შეეკამათა.

„ბატონი რომანი არის კიდევ იგივე ფანტაზიაში, რომ თითქოს ჩვენ ვცხოვრობთ 2012 წლამდე რეჟიმში,“ - განაცხადა ანრი ოხანაშვილმა.

ფრაქცია მოძრაობა თავისუფლებისთვის - ევროპული საქართველოს წევრი, ირაკლი აბესაძე, კამათის დროს დაინტერესდა, თუ რამდენჯერ მისცა პერსონალურ მონაცემთა დაცვის ინსპექტორმა ნებართვა ფარული მოსმენის დაწყების, საგამომძიებლო უწყებას. თამარ ქალდანმა ამ შეკითხვას პირდაპირი პასუხი არ გასცა და საპარლამენტო უმცირესობის მდივანს მოუწოდა, უწყებას ამ ინფორმაციის მიღების მიზნით, წერილობით მიმართოს.