ე.წ მოსმენების კანონთან დაკავშირებით პრეზიდენტი ენმ-სა და „ევროპული საქართველოს" წევრებს შეხვდა

პოლიტიკა - 18:18, 14 Mar, 2017

1169

საქართველოს პრეზიდენტმა გიორგი მარგველაშვილმა ე.წ ფარული მოსმენების კანონთა პაკეტთან დაკავშირებით საპარლამენტო ფრაქციებთან კონსულტაციები დაიწყო.

პრეზიდენტის ადმინისტრაციამ პრეზიდენტთან კონსულტაციებზე ყველა საპარლამენტო ფრაქცია მიიწვია, თუმცა პრეზიდენტის შეთავაზებას ამ ეტაპამდე მმართველი პარტია არ გამოხმაურებია.

დღეს გიორგი მარგველაშვილი ადმინისტრაციაში ხელმოსაწერად შესულ კანონთა პაკეტთან დაკავშირებით „ევროპული საქართველოს" წარმომადგენლებს შეხვდა, ფარული მოსმენების კანონზე ფრაქციის წევრების მოსაზრებები მოისმინა და საკუთარი ხედვა გააცნო.

დღესვე საქართველოს პრეზიდენტმა ფრაქცია „ერთიანი ნაციონალური მოძრაობის" წარმომადგენლებთანაც გამართა შეხვედრა.

„ჩვენ ვსაუბრობთ კანონში არსებულ ორი ტიპის პრობლემაზე. პირველი - რამდენად იქნება შესაბამისი ახალშექმნილი სააგენტო საკონსტიტუციო სასამართლოს გადაწყვეტილების და რამდენად დამოუკიდებელი იქნება ის და მეორე - ამ კანონმა შესაძლოა გაუმართლებელი ტვირთი დააკისროს ბიზნესს, რადგან ბევრგან კანონში მითითებულია, რომ სააგენტო იყენებს ბიზნესის და ამ შემთხვევაში საკომუნიკაციო კომპანიების რესურსებს სასყიდლის გარეშე“, - განაცხადა პრეზიდენტის საპარლამენტო მდივანმა ანა დოლიძემ შეხვედრის დასრულების შემდეგ.

ხვალ პრეზიდენტი „პატრიოტთა ალიანსის“ ლიდერებთან გამართავს შეხვედრას.