"სპეცოპერაციის დაგეგმვაში უშუალოდ იყო ჩართული სუს-ის უფროსის მოადგილე, მასთან დაპირისპირება მქონდა"- კილაძე

პოლიტიკა - 12:16, 14 Mar, 2017

7661

გაზეთ ქრონიკა პლიუსის მთავარი რედაქტორი ელისო კილაძე, აცხადებს, რომ მისი შვილის დაკავების პროცესში სამართალდამცველების მხრიდან ადგილი ჰქონდა სიტყვიერ და ფიზიკურ შეურაცხყოფას და ნივთმტკიცებულებების გაყალბებას.

ელისო კილაძის თქმით, მომხდარში სახელმწიფო უსაფრთხოების სამსახურის ხელმძღვანელის მოადგილე იოსებ გოგაშვილი უშუალოდ მონაწილეობდა.

„ის არის სუფთა, ნარკოტიკული ზეგავლენის ქვეშ არ იმყოფება, დამატებით გადატანილია ეს ნიმუშები დალუქულ მდგომარეობაში, ექსპერტიზაზე. ორი პაკეტი არ ვიცით ჩვენ ჯერჯერობით რა არის, გაურკვეველი ფხვნილია და ამიტომ, სრულიად გაუგებარია, რატომ დაიწყო 260-ე მუხლით გამოძიება. არ მომხდარა მისი არც საცხოვრებელი ბინის ჩხრეკა, ისევე როგორც არ მომხდარა მისი ავტომობილის ჩხრეკა, რომლითაც ის გადაადგილდებოდა.

რაც შეეხება სხვა დეტალებს, პირდაპირ გეუბნებით, რომ სპეცოპერაციის დაგეგმვაში უშუალოდ იყო ჩართული სუს-ის უფროსის მოადგილე იოსებ გოგაშვილი, რომელთანაც მე მაქვს ძალიან დიდი ხნის დაპირისპირება.

ვიცი იმ ორი ინფორმატორის ვინაობა, სახელებით და გვარებით, ფოტოები მაქვს მათი და სახეებზე. თვითმხილველებმა მითხრეს, რომ მთელი დღის განმავლობაში დილიდან იქ იყო პოლიცია მობილიზებული, მე ვიცი ვისთან ჰქონდა სატელეფონო კომუნიკაცია ჩემს შვილს, ერთი მათგანი დაკავებული იყო სწორედ ნარკოტიკებზე, საკმაოდ დიდი ოდენობით ნარკოტიკზე და ის გაათავისუფლეს ორი კვირის წინ,“ - განაცხადა ელისო კილაძემ.

ადვოკატის განცხადებით, დაკავებული დავით ხარშილაძე ფიზიკურ და სიტყვიერ შეურაცხყოფას და სხვადასხვა პროცესუალურ დარღვევებს.

ადვოკატის ინფორმაციით, დაკავებულს შუბლის არეში დაკავებულს აღენიშნება.

დავით ხარშილაძე ბრალდებას არ აღიარებს. დღეს 14:00 საათზე დაკავებულის ახლობლები დიღომში, პოლიციის სამმართველოს შენობასთან შეიკრიბებიან.

ელისო კილაძის შვილი დავით ხარშილაძე გუშინ დააკავეს. მას ბრალი სისხლის სამართლის კოდექსის 260-ე მუხლით უკვე წარედგინა, რაც ნარკოტიკული საშუალების შეძენას, შენახვას, დამზადებას, გადაგზავნასა და გასაღებას გულისხმობს.

კილაძე შვილის დაკავებას მის ჟურნალისტურ საქმიანობას უკავშირებს.