"სამართლებრივი ხარაკირი" - ოპოზიცია იმედოვნებს რომ ხელისუფლება R2-საქმეზე ევროკონვენციას არ დაუპირისპირდება

პოლიტიკა - 09:44, 14 Mar, 2017

4472

ქიბარ ხალვაშის ადვოკატი არ გამორიცხავს, რომ სტრასბურგის სასამართლოს გადაწყვეტილების შემდეგ, ტელეკომპანიის დასაბრუნებლად საკონსტიტუციო სასამართლოს მიმართოს. ფაქტს უკვე მოჰყვა პოლიტიკოსებების შეფასებები.

ოპოზიციაში თანხმდებიან, რომ სტრასბურგის გადაწყვეტილების უგულვებელყოფის შემთხვევაში კიდევ ერთხელ გამოჩნდება რუსთავი 2-ის საქმეში ხელისუფლების ინტერესი.

ევროპული საქართველოს ერთ-ერთი ლიდერი გიორგი ტუღუში აღნიშნავს, რომ მსგავი გადაწყვეტილებით რუსეთმა მასხრად უკვე აიგდო თავი.

“ეს არის სამართლებრივი ხარაკირი, თვითმკვლელობა. არა მარტო მთავრობის, არამედ მთლიანად ქვეყნისთვის ეს იქნება ერთ-ერთი ყველაზე სამარცხვინო მოქმედება. ევროსასამართლოს გადაწყვეტილების არდამორჩილება და გადახედვა, ეს უფრო რუსეთის ფედერაციის თემაა და მათ აქვთ რაღაც მსგავსი კომპეტენციები საკუთარი საკონსტიტუციო სასამართლოსთვის მინიჭებული, მაგრამ ეს ერთის მხრივ შემაშფოთებელია და მეორეს მხრივ რუსეთმა ამით საკუთარი თავი აიგდო მასხრად და ეჭვქვეშ დააყენა საკუთარი წევრობა ევროსაბჭოში,“ - განაცხადა გიორგი ტუღუშმა.

ნაციონალურ მოძრაობაის წევრი გია ბარამიძე აღნიშნავს, რომ პუტინმა რამდენიმე წლის წინ იუკოსის საქმეზე რუსული კანონმდებლობა ევროსასამართლოს ვერდიქტზე მაღლა დააყენა და პრაქტიკულად ევროპისგან თვითიზოლაცია გამოაცხადა.

„თუ ივანიშვილი ასეთ ნაბიჯს გადადგამს და პირდაპირ ასე თავხედურად, რაღაცა მექანიზმებით პარლამენტის ერთ მეხუთედს ან ვინმეს სხვას, მთავრობას აიძულებს, რომ საკონსტიტუციო სასამართლოში ასეთი სარჩელი შევიდეს და საკონსტიტუციო სასამართლოს, რომელსაც ახლა უკვე აკონტროლებს, თავისი ჩანერგილი ადამიანებით მანანა კობახიძით და სხვებით, მიაღებინოს გადაწყვეტილება, რომ ჩვენ გამოგვიყვანოს ევროპის სამართლებრივი სივრციდან,“ - აცხადებს გიორგი ბარამიძე..

ხელისუფლების პოზიცია კი არ შეცვლილა. უმრავლესობაში აცხადებენ, რომ დავა ორ კერძო სუბიექტს შორის მიმდინარეობს.

„ეს არის ქონებრივი დავა ორ სუბიექტს შორის, შესაბამისად, ერთი სუბიექტი თუ რაღაც ნაბიჯის გადადგმას აპირებს, ეს არის მისი უფლება. თუ კი ის დაცვის სტრატეგიას კონკრეტულად ჩამოაყალიბებს, ეს მისი უფლებაა, სხვა დანარჩენი საკითხი განხილული არ ყოფილა“ - აცხადებს დავით მათიკაშვილი.