საქართველოს პრეზიდენტმა ადმინისტრაციის წარმომადგენლებთან და პოლიტიკური პარტიების ლიდერებთან ერთად,დღეს კამპანია „კონსტიტუცია ყველასია” ფარგლებში შეხვედრები გამართა თელავის სახელმწიფო უნივრსიტეტში და დემოკრატიული ჩართულობის ცენტრში.

ქვეყნის პირველმა პირმა კონსტიტუციაში შესატან ცვლილებებთან დაკავშირებით სტუდენტებისა და საზოგადოების სხვადასხვა ჯგუფების მოსაზრებები მოისმინა.

აღნიშნულს დადებითაც აფასებს „ნიუპოსტთან“ საუბრისას კონსტიტუციონალისტი კოტე ჩოკორაია. მმართველი გუნდის რეაქციას ინიციატივასთან დაკავშირებით კი ჩოკორაია უსაფუძვლოს უწოდებს:

„მე ვფიქრობ, რომ ძალიან საინტერესო პროექტი დაიწყო, ეს პროექტი აძლევს საშუალებას საქართველოს მოქალაქეებს აქტიურად იყვნენ ჩართულნი, კონსტიტუციური საკითხების განხილვაში. ერთის მხრივ ეს შესაძლოა იყოს მიმართული, როგორც საკონსტიტუციო რეფორმის ფარგლებში მოქალაქეების მოსაზრებები იყოს მიტანილი საკონსტიტუციო კომისიამდე, მეორეს მხრივ ეს შეიძლება იყოს ორიენტირებული კონსტიტუციური ღირებულებების შესახებ ცოდნის ამაღლებაზე და მნიშვნელოვანია, რაც უფრო მეტი ორგანიზაცია განახორციელებს ასეთი ტიპის პროექტს. მესამე, ეს შესაძლოა იყოს საკონსტიტუციო კომისიისათვის გარკვეული ნიშანი, რომ კიდევ უფრო გაიზარდოს ჩართულობა საკონსტიტუციო რეფორმის ფარგლებში, ეს მხოლოდ მისასალმებელი იქნება, მხოლოდ დადებითად ვუყურებ ამ საკითხს.

მე არ მგონია, რომ ეს იყოს სწორი შეფასება, თითქოს საერთო სახალხო განხილვის პროცესი მხოლოდ პარლამენტის უფლებამოსილება იყო და აუცილებლად ამაზე იყოს იგივე პრეზიდენტის დღევანდელ შეხვედრაზე საუბარი. აბსოლუტურად გამიჯნულია არსებობს, საერთო სახალხო განხილვის პროცედურა კანონით დადგენილი, რომელსაც პარლამენტი განახორციელებს, ეს არის საჯარო დისკუსია და საჯარო განხილვა კონსტიტრუციასთან დაკავშირებით. არავითარი ფორმალური სამართლებრივი შეზღუდვა პრეზიდენტს ამასთან დაკავშირებით არ გააჩნია“, - განაცხადა კოტე ჩოკორაიამ.