ერთიანი ნაციონალური მოძრაობის პოლიტიკური საბჭოს თავმჯდომარის მოადგილე, ლევან ვარშალომიძე, ბათუმში განვითარებულ მოვლენებს სპეციალურ ბრიფინგზე გამოეხმაურა. როგორც ვარშალომიძე ამბობს, მომხდარზე პასუხისმგებლობა საქართველოს ხელისუფლებას ეკისრება.

ერთიანი ნაციონალური მოძრაობის პოლიტიკური საბჭოს თავმჯდომარე აღნიშნავს, რომ ბათუმში ღამით განვითარებული მოვლენები, პირველ რიგში, სახელმწიფო უსაფრთხოების სამსახურის ინტერესებში შედიოდა.

„ამის შემდეგ აქციაზე გამოჩნდა ჯგუფი, სუს-ის მიერ მართული, რასაც შემდგომში მოჰყვა ის ვანდალური ფაქტები, რაც საზოგადოებისთვის უკვე ცნობილია,“ - განაცხადა ლევან ვარშალომიძემ და იქვე განმარტა, რომ შინაგან საქმეთა მინისტრის მოადგილეს თავის დროზე უნდა შეესრულებინა დაპირება და 6 ადამიანი გაეთავისუფლებინა, ამის ნაცვლად კი პოლიციამ ხალხს სპეციალური დანიშნულების რაზმი დაუპირისპირა.

„ბათუმში მომხდარ ვანდალურ ფაქტზე პასუხისმგებლობა ცალსახად ეკისრება საქართველოს ხელისუფლებას. ყველამ კარგად იცის, რომ ეს სპონტანური აქცია არ გამოწვეულა და არ გამოუწვევია საპატრულო პოლიციის მიერ იმ კონკრეტულ დღეს დაწერილ ჯარიმას, ეს ჯარიმა იყო ბოლო წვეთი იმ უსამართლობისა, ნეპოტიზმისა, კორუფციისა და მძიმე სოციალური ფონისა, რაც ბოლო 5 წლის განმავლობაში დაგროვდა ჩვენს რეგიონში და მთლიანად საქართველოში,“ - განაცხადა ლევან ვარშალომიძემ.