"ბათუმის აქცია იყო ორგანიზებული და ამის ყველა ნიშანი სახეზე გვაქვს"- ოთო კახიძე

პოლიტიკა - 12:52, 13 Mar, 2017

3598

,,მოძრაობა თავისუფლებისთვის-ევროპული საქართველოს’’ წევრი ოთარ კახიძე 11-12 მარტს ბათუმში განვითარებულ მოვლენებთან დაკავშირებით აცხადებს, რომ აქცია იყო ორგანიზებული და ამის ყველა ნიშანი სახეზე გვაქვს.

,,იქ იყო მიტანილი ქვები, ტომრები, აქციის მონაწილეებს ჰქონდათ ჯაჭვები, აირწინაღები, მოლოტოვის კოქტეილები და იყვნენ ორგანიზებულები. გუშინ, ჩვენ მოვისმინეთ ინტერვიუ ბატონ ღოღობერიძესთან, რომელიც არის სუს-ის ცნობილი ზონდერი. ის ხელისუფლების დავალებით თავს ესხმოდა საკონსტიტუციო სასამართლოს და პოლიტიკურ ოპოზიციას. ეს ადამიანი არ მალავს, რომ ამ აქციის ორგანიზატორი იყო თავად. გამოძიებამ უნდა მოიკითხოს მთავრობის შიგნით კიდევ ვინ იყვნენ ჩართულები ამ აქციის ორგანიზებაში ღოღობერიძესთან ერთად. აგრეთვე უნდა დადგეს ყველა იმ პირის პასუხისმგებლობის საკითხი, ვისაც წესრიგის და უსაფრთხოების დაცვა ევალებოდა ჩვენი ქვეყნის ერთ-ერთ უდიდეს ქალაქში, რომელიც არის საინვესტიციო და ტურისტული ცენტრი და რომელიც მთელი ღამის განმავლობაში სახელმწიფომ ორგანიზებულ ხულიგნებს დაარბევინა და არაფერი გააკეთა იმისთვის, რომ აღეკვეთა ეს ვანდალიზმი. ხელისუფლების მცდელობა, რომ გადააბრალოს ყველაფერი ,,ნაციონალურ მოძრაობას’’ არის აბსოლუტურად უსუსური. მართალია, ,,ნაციონალურმა მოძრაობამ’’ ვერ გაუძლო პოლიტიკურ ცდუნებას, რომ გამოეყენებინა ეს პროტესტის აგორებული ტალღა და ვერ გაერკვა ვითარებაში, ეს არ ნიშნავს, რომ ხელისუფლებამ ხელი შეაწმინდოს. ქალაქი დააზიანეს, დაწვეს და საათების განმავლობაში ხელისუფლებამ არაფერი გააკეთა იმისთვის, რომ შეეჩერებინა ეს ვაგხანალია, რაც ნიშნავს, რომ ჩვენი მოქალაქეების საკუთრება, ჩვენი ქალაქები არ არის დაცული და ეს არის პირველ რიგში ხელისუფლების პასუხისმგებლობა. ეს არის ხელისუფლების ხელწერა. ხუთი წლის განმავლობაში ისინი ანგრევენ სახელმწიფო ინსტიტუტებს,’’- განაცხადა ოთარ კახიძემ.