,,სამართალდამცავთა დაცვის ლიგა“ შსს-ს ბათუმში მომხდარი ვანდალური ფაქტების დროული გამოძიებისკენ მოუწოდებს

პოლიტიკა - 17:22, 12 Mar, 2017

2381

ბათუმში მომხდარ მოვლენებს ეხმაურებიან ,,სამართალდამცავთა დაცვის ლიგის“ წევრები. როგორც განცხადებაშია აღნიშნული, ასეთი ქმედებები შედეგია სამართალდამცავების მიმართ არაერთგზის განხორციელებული ღირსების შემლახავი ქმედებებისა. ორგანიზაციაში აცხადებენ, რომ ეს ვანდალური ფაქტი პირდაპირ ურტყამს ქვეყნის დემოკრატიულ განვითარებას და მოუწოდებენ შს სამინისტროს, მოხდეს დროული გამოძება და დამნაშავე პირები სათანადოდ იყვნენ დასჯილნი.

"სამართალდამცავთა დაცვის ლიგა" გმობს, გასულ ღამეს ბათუმში განხორციელებულ ვანდალურ ქმედებებს. აღნიშნული შეიცავს სისხლის სამართლის კოდექსის მუხლებით გათვალისწინებულ დანაშაულს. საქართველოს საზოგადოებამ პირდაპირ ეთერში უყურა, პოლიციელთა ავტომანქანების მტვრევას, მსხვრევას, დაწვას, პოლიციელთა მასიურ შეურაცხყოფას, ბათუმისა და ბათუმელების ქონების განადგურებას. ამასთან, ვიხილეთ 6-7 საათის განმავლობაში უმოქმედო პოლიცია, რომელიც მხოლოდ შსს-ს აჭარის სამხარეო მთავარ სმმართველოში იყო ,,გამაგრებული" და ნებაზე მიშვებული უმართავი ადამიანები. ბუნებრივია, საზოგადოებას უჩნდება კითხვა, თუ რამ გამოიწვია ეს მოვლენები, იყო თუ არა ის ორგანიზებული, ან რატომ ვერ მოახდინა შსს-მ ამ ვანდალიზმის პრევენცია ან დროული აღკვეთა . "სამართალდამცავთა დაცვის ლიგა" წლების განმავლობაში ინტენსიურად აძლევდა რეკომენდაციას სახელმწიფოს თუ როგორ უნდა დაეცვათ პოლიციელთა ღირსება. ბათუმში პოლიციელთა მიმართ განხორციელებული თავდასხვა არ იყო პირველი ფაქტი. წლების განმავლობაში პოლიციელთა მიმართ ხორციელდებოდა ძალადობა. რაც გამოიხატებოდა პოლიციის ეზოში 2 პოლიციელის მკვლელობაში, პოლიციელის მკვლელობისთვის ძებნილი პირის მიერ კიდევ პოლიციელის მკვლელობასა და პოლიციელების ავტომანქანების დაცხრილვაში, პოლიციელებისათვის ცეცხლის გახსნაში, პოლიციის ეზოში პოლიციელისთვის დანით თვალის ამოთხრაში, პოლიციელთა მკვლელობის მცდელობებში, პოლიციელებზე გახშირებულ თავდასხმებში, საზოგადოებისთვის ცნობადი სახეების ან მათი შვილების მიერ, პოლიციელთა ცემასა და ღირსების შელახვაში. სახელმწიფო ხელისუფლების მაღალი თანამდებობის პირის მიერ, პოლიციელისთვის პირდაპირ ეთერში სამხრეების ახევაში. ასევე იყო შემთხვევები, როდესაც პოლიციელებზე მიტანილი თავდასხმები 100 ლარად შეფასდა. სწორედ აღნიშნული ფაქტებზე არასათანადო რეაგირება გახდა ყოველივე ზემოაღნიშნულის ერთ-ერთი გამომწვევი. საზოგადოებას მოვუწოდებთ სიმშივიდსკენ, რადგან აღნიშნული ვანდალური ფაქტები პირდაპირ ურტყამს ქვეყანაში დემოკრატიის განვითარებას. ასევე, მოვუწოდებთ შინაგან საქმეთა სამინისტროს დროულად გამოიძიონ და დასჯილ იქნეს ყველა დამნაშავე” - ნათქვამია განცხადებაში.