„ნაციონალურმა მოძრაობამ“ ბათუმში დაგეგმილი აქციები გააუქმა

პოლიტიკა - 14:40, 12 Mar, 2017

5372

ბათუმში, "ნაციონალური მოძრაობის" მიერ 12 მარტს დაგეგმილი აქციები აღარ გაიმართება, ამის შესახებ გამცხადება „ნაციონალური მოძრაობის“ ბათუმის ოფისში გამართულ ბრიფინგზე მირდატ ქამადაძემ გააკეთა.

„ნაციონალური მოძრაობა“ კიდევ ერთხელ მკაცრად ემიჯნება იმ ვანდალიზმს, რაც მოხდა გუშინ ბათუმში. პასუხისმგებლობა ამ მოვლენებზე სრულად ეკისრება საქართველოს ხელისუფლებას. აქვე საზოგადოებას გვინდა ვამცნოთ, რომ ხელისუფლება ცდილობს, ეს მოვლენები გადააბრალოს „ნაციონალურ მოძრაობას“. იმისთვის, რომ საზოგადოება არ იყოს დაძაბულ მდგომარეობაში, ჩვენ დღეს, 18:00 საათისთვის დაანონსებული აქცია გავაუქმეთ.

ხელისუფლებას მოვუწოდებთ, ნაცვლად პოლიტიკური განცხადებებისა და ოპონენტებზე გადაბრალებისა, დაუყოვნებლივ გამოიძიოს გუშინ განვითარებული ვანდალური მოვლენები და მიუხედავად იმისა, ვინ იქნება დამნაშავე, მკაცრად აგებინონ მათ პასუხი“, - განაცხადა ქამადაძემ.

„შევთავაზეთ დაუყოვნებლივ გაეთავისუფლებინა მომიტინგეები და ბუნებრივია, იქნებოდა შესაძლებლობა იმისა, რომ მშვიდობიანი აქცია მშვიდობიანადვე დაშლილიყო. ნაცვლად ამისა, შინაგან საქმეთა სამინისტრომ, იმ დათქმულ დროში სპეცნაზი გამოუშვა და დაიწყო უკვე მეორე აქცია, რომელსაც, ბუნებრივია, მშვიდობიანთან კავშირი არ ჰქონდა. ამ აქციის მთავარი ორგანიზატორები იყვნენ ადამიანები, რომლებიც ჩვენ ხშირად გვინახავს ჩვენი პარტიის ოფისთან მოსულები. ესენი იყვნენ ადამიანები, რომლებიც ხან ჩვენი პარტიის ოფისს, ხან საკონსტიტუციო სასამართლოს თავმჯდომარეს კვერცხსა და ქვებს ესროდნენ. ამიტომ სრული უპასუხისმგებლობაა ამ მესიჯების ნაციონალური მოძრაობის მიმართულებით გადმოყვანა,“ - განაცხადა ერთიანი ნაციონალური მოძრაობის ბათუმის რაიონული ორგანიზაციის თავმჯდომარემ, გიორგი კირთაძემ.