შს მინისტრის მოადგილე: აჭარის პოლიციის გათავისუფლების საკითხი არ იხილება

პოლიტიკა - 00:39, 12 Mar, 2017

24962

შინაგან საქმეთა მინისტრის მოადგილის ბესიკ ამირანაშვილის განცხადებით, რომელიც ამ დროისათვის ბათუმში იმყოფება, აქციის მონაწილეების მიერ ნასროლი ქვების გამო, უამრავი პოლიციელია დაშავებული.

როგორც მინისტრის მოადგილემ საზოგადოებრივს სატელეფონო ჩართვისას განუცხადა , პოლიციელები გამაგრებულები იყვნენ ადმინისტრაციული შენობის კართან, რა დროსაც, დიდი რაოდენობის ხალხი მათ თავს დაესხა.

მისი ინფორმაციით, დაშავებულთა შორის არიან სპეცდანიშნულების რაზმის ხელმძღვანელი და სამხარეო პოლიციის ხელმღვანელი.

„ნახევარი საათი ისროდნენ ქვებს პოლიციელების მისამართით და შემდეგ მოხდა ძალის გამოყენება“, - განაცხადა შს მინისტრის მოადგილემ.

რაც შეეხება აქციის მონაწილეების მოთხოვნას, რომ გათავისუფლდეს პოლიციის უფროსი, ამირანაშვილი აცხადებს, რომ ის ახალი დანიშნულია.

„თუ რომელიმე კონკრეტულ გადაცდომას ქონდა ადგილი, შეისწავლის გენინსპექცია, გათავისუფლების საკითხი არ დგას“, - განაცხადა მან.

აქციის მონაწილეები დღეს, ბათუმში დაკავებული პირების გათავისუფლებას ითხოვენ.

ვითარებ მას შემდეგ დაიძაბა, რაც პოლიციამ ორი მძღოლიავტომნქანის უკანონო გაჩერებისთვის ჯერ დააჯარიმა, შემდეგ კი დააკავა.

განცხადება გააკეთა სახალხო დამცველმა და იმედი გამოთქვა, რომ პოლიცია არ გასცდება კანონის ფარგლებს. უჩა ნანუაშვილი აქციის მონაწილეებს და სამართალდამცავებს სიმშვიდისკენ მოუწოდებს.

ამასთან, აქციის მონაწილეები თანამდებობიდან აჭარის საპატრულო პოლიციის ახალი უფროსის კახა ბუხრაძის გადაყენებასაც მოითხოვენ. მათი განცხადებით, სწორედ ბუხრაძის დანიშვნის შემდეგ ქალაქში მძღოლების მიზანმიმართული დაჯარიმება დაიწყო. კახა ბუხრაძე შინაგან საქმეთა სამინისტროს აჭარის საპატრულო პოლიციის უფროსად მიმდინარე წლის იანვარში დაინიშნა.