"შეურაცხყოფას პასუხს მიზანმიმართულად არ ვცემ, მაგრამ ცოტა ნუ დავიბნევით ამ მდგომარეობით"- პრეზიდენტი უმრავლესობის კრიტიკაზე

პოლიტიკა - 19:43, 10 Mar, 2017

2856

საქართველოს პრეზიდენტის თქმით, მისი დადანაშაულება პარლამენტის უპატივცემულობაში არარეალურია. გიორგი მარგევლაშვილის თქმით, პარლამენტის მხრიდან რომ ყოფილიყო შეტყობინება, რომ პრეზიდენტთან შეხვედრა საპატრლამენტო სესიას ემთხვეოდა, ის მზად იყო შეხვედრა გადაედო. როგორც პრეზიდენტმა ინგა გრიგოლიას გადაცემა „არჩევანში“ აღნიშნა, უმრავლესობის წევრებს ხშირად „გაურბით სიტყვა“ პრეზიდენტთან ურთიერთობაში, თუმცა თავად ის ანალოგიურ პასუხს არ სცემს და თანამშრომლობის გაგრძელებას ცდილობს:

„ძალიან შევეჩვიეთ ცოტა ზედმეტი სიტყვის გაქცევას, ცოტა ზედმეტად ნერვულ საუბარს. ბოლო სამი წლის განმავლობაში რომ „დასქროლოთ“ პატივცემული დეპუტატების და მინისტრების განცხადებები და განწყობა რომლითაც მეურთიერთებიან, ეს აგრესია, უნარი რომ ძალიან იოლად სიტყვა გაექცეთ, ძალიან იოლად ნერვებს ვერ ითოკავენ... იცით რა, მინდა გითხრათ, რომ ძალიან შთამბეჭდავი ლექსიკონი შეიძლება შეიქმნას იმ უპატივცემულო გამონათქვამების და შეურაცხყოფის, რომელსაც ძალიან მიზანმიმართულად პასუხს არ ვცემ და არასდროს გამქცევია სიტყვა. არასდროს პიროვნულად არ გამიხსენებია, ვინ სად იყო და რას აკეთებდა, მომავალშიც ასე ვაპირებ, მაგრამ ცოტა ნუ დავიბნევით ამ მდგომარეობით. 3 წელიწადია ერთხელ არ გამქცევია სიტყვა არცერთ ადამიანზე, რომელიც პიროვნულად ვერც წინა ცხოვრებაში და ვერც ამ ცხოვერებაში ამის მეასედს ვერ გამიბედავდა, რასაც ეთერში ბედავენ და ძალიან მშვიდად ვპასუხობ. არანაირი უპატივცემულობა იმაში არაა, რომ იმ დღეს დავპატიჟეთ, როდესაც სესია იყო, ერთი ზარიც რომ ყოფილიყო, გადავდებდით შეხვედრას“- განაცხადა გიორგი მარგველაშვილმა.