"ჩემს აწყობილ სტრუქტურებს მე უკან არ ვუბრუნდები ხოლმე"- ანდრიაძე "ერთსულოვნებაში" დაბრუნებას უარყოფს

პოლიტიკა - 14:31, 10 Mar, 2017

8409

„ქართული უნივერსიტეტის“ სამეთვალყურეო საბჭოს თავმჯდომარე გიორგი ანდრიაძე საპატრიარქოს ტელევიზია „ერთსულოვნების“ ხელმძღანელობას არ აპირებს. ამის შესახებ ანდრიაძემ „იმედთან’ სატელეფონო საუბარში განაცხადა. მისი თქმით ამის არც სურვილი აქვს და არც საჭიროება არსებობს:

„არანაირი სურვილი არა მაქვს და არც საჭიროება არაა, იმიტომ რომ ჩემს აწყობილ სტრუქტურებს მე უკან არ ვუბრუნდები ხოლმე, სრულიად საკმარისი იქნება იქ პატრიარქის ნებისმიერი ერთგული ადამიანის დანიშვნა. არც შეთავაზება არ არსებობს და არც ჩემგან ინიციატივა. ძველი მეპატრონეებისგან ტელევიზიების დაბრუნება ცალკე კომენტარების საგანია. საპატრიარქოში იციან არანაირი სურვილი არა მაქვს და არც საჭიროება არაა რომ მე იქ დავბრუნდე.“- განაცხადა გიორგი ანდრიაძემ.

ტელევიზია „ერთსულოვნების“ დირექტორის ადგილი მას შემდეგ გახდა ვაკანტური, რაც პატრიარქის და წმინდა სინოდის გადაწყვეტილებით აღნიშნული თანამდებობა ჭყონდიდელ მიტროპოლიტ პეტრე ცაავას დაატოვებინეს. აღნიშნული გადაწყვეტილება მეუფე პეტრეს მიერ ბოლო დროს გაკეთებულ განცხადებებს უკავშირდება, რომელიც საპატრაირქოში არსებულ პრობლემებს შეეხებოდა.

წმიდა სინოდის თქმით მიტროპოლიტი პეტრე უხეშად არღვევს ეკლესიის მიერ სასულიერო პირთათვის დადგენილ კანონიკურ და ეთიკურ ნორმებს, რომ მისი განცხადებები მიმართულია ეკლესიის დისკრედიტაციისკენ და წარმოადგენს საქართველოს საპატრიარქოში მოღვაწე რიგ სასულიერო და საერო პირთა მიმართ ცილისწამებას და დაუსაბუთებელ ბრალდებას, რაც დამაბრკოლებელია და შფოთის მომტანი როგორც საქართველოს მართლმადიდებელი ეკლესიის მრევლში, ასევე ზოგადად ქვეყანაში და უცხოეთში მცხოვრებთა შორის. წმიდა სინოდის გუშინდელი დადგენილებით, ჭყონდიდელ მიტროპოლიტ პეტრე ცაავას გაფრთხილება მიეცა და გათავისუფლდა საპატრიარქოს ტელევიზია „ერთსულოვნების“ დირექტორის თანამდებობიდან.