საკონსტიტუციო ცვლილებების საჯარო განხილვა - არასამთავრობოების აზრით მმართველი გუნდის ბოიკოტი უსაფუძვლოა

პოლიტიკა - 12:21, 10 Mar, 2017

1294

საკონსტიტუციო ცვლილებებთან დაკავშირებით დღეს პრეზიდენტის ადმინისტრაციაში შეხვედრა გაიმართება.

"ეს არის ძალიან მნიშვნელოვანი შეხვედრა, რომელსაც საქართველოს სახელმწიფოს მეთაური მართავს საზოგადოებასთან. იწყება კონსტიტუციის ირგვლივ მსჯელობა და კარგი იქნებოდა ამ პროცესში ხელისუფლება ჩართულიყო. სამწუხაროდ ხელისუფლებამ სხვა პოზიცია აირჩია. ის პრეზიდენტის წინააღმდეგ კამპანიას იწყებს და ეს მოქმედებები შეიძლება აიხსნას იმით, რომ ისინი კონსტიტუციის საკუთარ თავზე მოსარგებად ემზადებიან"- განაცხადა კოტე ჩოკორაიამ.

საიას ხელმძღვანელი კი ხელისუფლების ბოიკოტს უსაფუძვლოს უწოდებს. ანა ნაცვლიშვილის განცხადებით, რაც შეიძლება მეტი ფორმატი უნდა შეიქმნას, რომ არსებითად მოხდეს კონსტიტუციაზე მსჯელობა.

"ამას ითვალისწინებს კონსტიტუციის ცვლილების პროცესი, საერთო სახალხო განხილვები უნდა დაიწყოს, თუმცა თუ მანამდეც მოხდება კონსტიტუციის მნიშვნელოვან საკითხებზე მსჯელობა, იქნება ეს პრეზიდენტის ეგიდით მოწვეული შეხვედრა, არასამთავრობოების თუ თვითონ პარლამენტის, ამაში დამაზიანებელი არაფერი არ იქნება"- თქვა ანა ნაცვლიშვილმა.

საკონსტიტუციო ცვლილებებთან დაკავშირებით დღეს პრეზიდენტის ადმინისტრაციაში შეხვედრა გაიმართება. ის სამ საათზეა ჩანიშნული და 170 სტუმარია მიწვეული. დღეს კამპანიის პრეზენტაციაა დაგეგმილი და მიწვეულ სტუმრებს იმ ღონისძიებებს გააცნობენ, რომელსაც მოიცავს საერთო საყოველთაო განხილვის პროცესი, რომელიც უახლოეს პერიოდში დაიწყება.