"ხელისუფლება გაბრაზებული ბავშვივით იქცევა, ჯიუტად რომ ცდილობს, არ აღიაროს მისი ცელქობა"- სტრასბურგის სასამართლო და ,,ოცნების“ მესიჯბოქსი

პოლიტიკა - 14:08, 09 Mar, 2017

1421

ქართული ოცნების მიერ სტრასბურგის გადაწყვეტილებაზე გაკეთებულ შეფასებებს და ხელისუფლების მესიჯს, რომ რუსთავი 2 საქართველოს წინააღმდეგ მოქმედებს "ნიუპოსტთან" ექსპერტი კოტე ჩოკორაია გამოეხმაურა.

მისი თქმით, ხელისუფლების განცხადებები გაბრაზებული ბავშვის პოზიციას ჰგავს.

"მმართველი პოლიტიკური ძალის წარმომადგენლების განცხადებები არის დემაგოგია და გათვლილია მოსახლეობის მიმართ, რომლებიც ასე ღრმად ვერ ერკვევიან პროცედურულ საკითხებში. ეს არის ძალიან ცუდი ფაქტი, რომელიც კიდევ ერთხელ ადასტურებს, რომ ხელისუფლებას რუსთავი 2 -ის საქმესთან დაკავშირებით თავისი პოლიტიკური დამოკიდებულება ჰქონდა და დღეს თავისი ინტერესების დაცვას ცდილობს ვითომდა საქართველოს სახელმწიფო ინტერესების დაცვით. მოიხსენიებს რუსთავი 2 -ს და ნაციონალურ მოძრაობას საქართველოს მოწინააღმდეგე მხარედ. ჩემი მოსაზრებით ეს არასწორი, პოლიტიკური განცხადებებია, უპატივცემულობაა ადამიანის უფლებათა დაცვის ევროპული სასამართლოსი, უპატივცემულობაა იმ კონვენციის, რომელზეც სახელმწიფოს აქვს ხელი მოწერილი, რაც ნიშნავს, რომ ჩვენ პატივს ვცემთ ევროსასამართლოს. ხელისუფლება ამ განცხადებებით ცდილობს გადაიფაროს ის უპრეცენდენტო გადაწყვეტილება, რომელიც სტრასბურგის სასამართლომ მიიღო საქართველოს უზენაესი სასამართლოს გადაწყვეტილების აღსრულების შეჩერებასთან დაკავშირებით. ალეგორიულად რომ შევხედოთ, ხელისუფლების განცხადებები გაბრაზებული ბავშვის პოზიციას ჰგავს, რომელიც ჯიუტად ცდილობს, რომ არ აღიაროს მის მიერ ჩადენილი გარკვეული ცელქობა. ასეთი განცხადებები საზოგადოებისთვის თვალში ნაცრის შეყრას ნიშნავს"- განაცხადა ექსპერტმა.