"ხელისუფლება რუსთავი 2-ის მიმართ ზიზღს ვერ მალავს" - ოპოზიცია თალაკვაძის განცხადებას აფასებს

პოლიტიკა - 12:32, 09 Mar, 2017

3601

რუსთავი 2-ის ირგვლივ განვითარებული მოვლენების შეფასებისას საპარლამენტო უმრავლესობის ლიდერი არჩილ თალაკვაძე ამბობს, რომ ბოლო პერიოდში არსებული უცნაური სიხარული და ნიშნის მოგება მომავალ თვეში დასრულდება.

უმრავლესობის ლიდერის ამ განცხადებას ოპოზიციის კრიტიკა უკვე მოჰყვა. ევროპული საქართველოს ერთ-ერთი ლიდერი ირაკლი აბესაძე აღნიშნავს, რომ ხელისუფლება ვერ მალავს პოლიტიკურ ზიზღს რუსთავი 2-ის კოლექტივის მიმართ.

"ხელისუფლების წარმომადგენლების, მათ შორის ბატონი თალაკვაძის განცხადება პირდაპირ მიანიშნებს ხელისუფლების პირდაპირ ჩართულობას ე.წ ორი კერძო სუბიექტს შორის დავაში, რუსთავი 2 -ის საქმეში. ხელისუფლება ვერ მალავს პოლიტიკურ ზიზღს რუსთავი 2-ის კოლექტივის მიმართ. ძალიან საინტერესოა ყველა ის მხილება, რომელსაც ისინი საკუთარ თავს უწყობენ"- განაცხადა აბესაძემ.

ერთიანი ნაციონალური მოძრაობაში კი დარწმუნებულები არიან, რომ ყოფილი პრემიერი თავისუფალი ტელევიზიის წინააღმდეგ დაწყებულ ბრძოლას წააგებს.

"როდესაც ევროპის სასამართლომ დაიცვა თავისუფალი სიტყვა და დადგა ჩვენი დემოკრატიის სადარაჯოზე ამის დასრულებას თუ გულისხმობს თალაკვაძე, მას უნდა რცხვენოდეს. მე დარწმუნებული ვარ, რომ ბიძინა ივანიშვილი ყველაფერს გააკეთებს თავს დაესხას და ყველაფერი გააკეთოს გეგმის განსახორციებლად, მაგრამ აქვე დარწმუნებული ვარ ის იმთავითვე კრახს განიცდის როგორც ეს აქამდე განიცადა"- განაცხადა თინათინ ბოკუჩავამ.