ვანო მერაბიშვილის საქმესთან დაკავშირებული ზეპირი მოსმენა სტრასბურგის სასამართლოს ოფიციალურ ვებგვერდზე ცოტა ხნის წინ გამოქვეყნდა.

მერაბიშვილის ადვოკატმა, ფილიპ ლიჩმა დეტალურად ისაუბრა შინაგან საქმეთა ყოფილი მინისტრის საკნიდან შესაძლო გაყვანაზე.

„მინდა შევეხო ინციდენტს, რომელიც 2013 წლის 14 დეკემბერს მოხდა, როდესაც დილის საათებში მომჩივანი გაიყვანეს საკნიდან მთავარ პროკურორთან, ფარცხალაძესთან და სასჯელაღსრულების დეპარტამენტის უფროსთან, დარბაისელთან შესახვედრად, მას უთხრეს, რომ თუ მიაწვდიდა ინფორმაციას ყოფილი პრემიერის, ზურაბ ჟვანიას გარდაცვალებასა ყოფილი პრემიერის სავარაუდო ანგარიშების შესახებ, ყველა ბრალდებას მოუხსნიდნენ, გაათავისუფლებდნენ პატიმრობიდან და ქვეყანაში ცხოვრების უფლებას მისცემდნენ, წინააღმდეგ შემთხვევაში მისი პირობები ციხეში აუტანელი გახდებოდა, ვიდრე ირაკლი ღარიბაშვილის მთავრობა იქნებოდა ხელისუფლებაში, მას გარდა საპატიმროში მისი მეგობრები და ნათესავები აღმოჩნდებოდნენ,“- განაცხადა ფილიპ ლიჩმა.

ადვოკატის თქმით, შინაგან საქმეთა ყოფილ მინისტრზე ხელისუფლების მხრიდან იყო ზეწოლა, რათა ის ჩამოეშორებინათ, როგორც პოლიტიკური ოპონენტი.