ევროსასამართლოს გადაწყვეტილებით საქართველოს უზენაესი სასამართლოს განჩინების აღსრულება რუსთავი 2-ის საქმეზე უვადოდ შეჩერებულია. რუსთავი 2-ის ეზოში კი პოლიტიკოსები და ტელეკომპანიის მხარდამჭერები არიან შეკრებილნი.

„ეროვნულ-დემოკრატიული პარტიის“ ლიდერის ბაჩუკი ქარდავას განცხადებით, საქართველოს უკუსვლას არავინ შეეგუება და ამის ნათელი მაგალითი რუსთავი 2-ის ირგვლივ მიმდინარე მოვლენებია:

„ევროსასამართლოს გადაწყვეტილებით ალბათ ყველა ვხვდებით, რომ რუსთავი 2-ის ხელყოფა არის გამორიცხული. სამწუხაროდ ხელისუფლებამ ჩვენს ქვეყანაში დამარხა სასამართლო სისტემა და ამაზე პირდაპირ მიგვანიშნა სტრასბურგმა, მაგრამ გადარჩა რუსთავი 2, ყოველ შემთხვევაში სიტყვის თავისუფლებას საფრთხე არ ემუქრება. მინდა მივულოცო ქართულ საზოგადოებას, დღეს ქვეყანა ბევრ რამეს გადაურჩა, რუსთავი 2 აღმოჩნდა კვლავ ის რგოლი ქვეყანაში, რომელმაც ჩვენი ევროატლანტიკური მიმართულება კიდევ ერთხელ გაამართლა და ქართულ საზოგადოებას დაანახა, 21-ე საუკუნეში საქართველოს უკუსვლას არავინ შეეგუება“, - განაცხადა ბაჩუკი ქარდავამ.