კონსტიტუციის გადასინჯვის პროცესისადმი მეტი ნდობისა და მაღალი კონსენსუსისთვის პრეზიდენტი კამპანიას იწყებს

პოლიტიკა - 15:30, 07 Mar, 2017

1326

კონსტიტუციის გადასინჯვის პროცესისადმი მეტი ნდობისა და მაღალი კონსენსუსისთვის პრეზიდენტი კამპანიას იწყებს - ამის შესახებ პრეზიდენტის პრესსპიკერმა ეკა მიშველაძემ დღეს გამართულ ბრიფინგზე განაცხადა.
მისი თქმით, კამპანიის პრეზენტაცია 10 მარტს გაიმართება.
"კიდევ, ერთი უმნიშვნელოვანესი თემა: ეს არის ცვლილებები კონსტიტუციაში. თქვენ ყველას გახსოვთ, პრეზიდენტის წინადადება საკონსტიტუციო კომისიის თანათავმჯდომარეობაზე იმისთვის, რომ გარანტირებული ყოფილიყო კონსტიტუციის გადასინჯვის პროცესისადმი მეტი ნდობა და მაღალი კონსესუსი. გიორგი მარგველაშვილმა ასევე მზადყოფნა გამოთქვა ჩართულიყო კონსტიტუციის საერთო სახალხო განხილვაში.

შესამაბისად, მინდა გაცნობოთ, რომ 10 მარტს პრეზიდენტის სასახლეში გაიმართება კამპანიის პრეზენტაცია, თუ რა სახის ღონისძიებებს მოიცავს და გულისხმობს აღნიშნული პროცესი, რომელსაც პრეზიდენტი უახლოეს მომავალში დაიწყებს.

ჩვენ საზოგადოებას, უფრო კონკრეტულად გავაცნობთ სამოქმედო გეგმას და კამპანიის მიზნებს. ზოგადად კი, პროექტი გულისხმობს კონსტიტუციასა და კონსტიტუციური ღირებულებების შესახებ საზოგადოებაში ცნობიერების ამაღლებას, და კონსტიტუციის შექმნის პროცესში მოქალაქეთა ჩართულობა, რაც თავისთავად უზრუნველყოფს დემოკრატიის მთავარ ღირებულებას - მომავალი სახელმწიფო მოწყობის მოდელში და ქვეყნის მართვაში, ხალხის ჩართულობის მეტ გარანტიებს. ამ კამპანიის მიზანია, საქართველოს თითოეულ მოქალაქეს ქონდეს შესაძლებლობა საკუთარი მოსაზრება დააფიქსიროს, ჩვენ კი, ამ შეხედულებებს საჯაროს გავხდით და იმედი გვაქვს, ისინი იქნება მოსმენილი და გაზიარებული. პრეზენტაციაზე მოწვეული არიან ადგილობრივი და საერთაშორისო ორგანიზაციები, პოლიტიკური პარტიების, დიპლომატიური კორპუსის წარმომადგენლები, კონსტიტუციონალისტები, საკონსტიტუციო კომისიის წევრები, მედიის და საზოგადოების წარმომადგენლები"- თქვა პრესსპიკერმა.