ტელეკომპანია რუსთავი 2 ადამიანის უფლებათა ევროპული სასამართლოს გადაწყვეტილებას ელოდება, დიდი ალბათობით რუსთავი 2-სთვის აღსრულების შეჩერების მექანიზმის გაგრძელებასთან დაკავშირებით ევროსასამართლოს გადაწყვეტილება, დღეს უნდა გახდეს ცნობილი.

„ქართულ ოცნებაში“ აცხადებენ, რომ არანაირი კითხვის ნიშნები არ გააჩნიათ და სასამართლოს გადაწყვეტილებას ელოდებიან:

“მხარე, რომელიც მეორე მხარეა ჩვენს ქვეყანაში, გამოხატავს სურვილს, რომ იყოს მესამე პირად ჩართული უკვე იმ დავაში, შესაბამისად, მე მგონი ეს ბუნებრივია. გვექნება შესაძლებლობა, რომ ვნახოთ სტრასბურგის მოსამართლეები რას გადაწყვეტენ დროებით ღონისძიებასთან დაკავშირებით, ანუ იმასთან დაკავშირებით, რომ აღსრულება უნდა შეჩერდეს გარკვეული ვადით,“ - განაცხადა თამარ ჩუგოშვილმა.

„ერთიანი ნაციონალურ მოძრაობის“ პოლიტიკური საბჭოს წევრის, გია ბარამიძის განცხადებით, ხელისუფლების ყველანაირი მცდელობა, ევროპის სასამართლოზე ზეგავლენა მოახდინონ, უშედეგო იქნება.

„საგარეო საქმეთა მინისტრის სამარცხვინო ვიზიტი, პრაქტიკულად პრეცედენტი არ აქვს და სხვებიც, რომლებიც ივანიშვილის ინტერესებს ახორციელებენ რუსთავი 2-ის ხელში ჩასაგდებად, რა თქმა უნდა, წარუმატებლად დასრულდება, იმიტომ, რომ საზოგადოებამ კარგად გააცნობიერა თუ რა მავნებლური გეგმა ჰქონდა ივანიშვილს რუსთავი 2-თან მიმართებაში და დარწმუნებული ვარ, რომ სტრასბურგის სასამართლო თავის კომპეტენტურ და გადამწყვეტ სიტყვას იტყვის საქართველოში მედიის თავისუფლების და რუსთავი 2-ის დასაცავად,“ - აცხადებს გია ბარამიძე.