„ივანიშვილის მანქანების და ბიზნესის გამო ბავშვები იწამლებიან“

„ივანიშვილის მანქანების და ბიზნესის გამო ბავშვები იწამლებიან“ - ხალხმრავალი აქცია ოზურგეთში

პოლიტიკა - 15:56, 03 Mar, 2017

25100

ოზურგეთის მუნიციპალიტეტის სოფელ ნაღობილევში ხალხმრავალი აქცია ამ წუთებში დასრულდა.

აქციის მონაწილეებმა საავტომობილო გზა გადაკეტეს და ჩინური კომპანიის კუთვნილ სატვირთო ავტომანქანებს გადაადგილების საშუალებას არ აძლევდნენ. სოფლის მოსახლეობამ ის გზა გადაკეტა, საიდანაც მძიმე ტექნიკას Black Sea Arena-s მიმდებარე ტერიტორიის მოწყობისთვის, მდინარე ნატანებიდან ინერტული მასალები გააქვთ.

ადგილობრივები ამბობენ, რომ სატვირთო ავტომანქანების აქტიური მოძრაობის გამო, სოფელში გზები კატასრტოფულ მდგომარეობაში აღმოჩნდა და მათ გადაადგილების პრობლემა ექმნებათ.

„გაუსაძლის მდგომარეობაში ვართ. მტვერი გვახრჩობს. უამინდობაში ატალახებულია ყველაფერი. აქ არ იცხოვრება და თუ ასე გაგრძელდა, მთავრობის კანცელარიასთან აქციებს გავმართავთ. შეუძლებელია ასე გაგრძელება. არ გავატარებთ ამ სატვირთოებს, სანამ არ მოგვარდება პრობლემა" - აცხადებს აქციის მონაწილე, თემური გუჯაბიძე.
„თუ არ დაგვაკმაყოფილებენ, მთელი სოფელი ფეხზე დავდგებით და დიდ მანქანებს არ გავატარებთ. გავა ოთხი წელი, დაიწყება არჩევნები, დაიწყება ტკბილი სიტყვები. გვეყო, აღარ გვინდა! 70 წლის ქალი ვარ და დამღალმა მაგათმა ლამაზმა სიტყვებმა. 9-ჯერ რომ დაგვპირდები, ერთხელ მაინც ხომ უნდა შეასრულო"- აღნიშნავენ აქციის მონაწილეები.

როგორც ადგილობრივები „გურიის მოამბესთან" საუბარში აცხადებენ, რომ სოფელში ცხოვრება უკვე გაუსაძლისი გახდა, დიდი მანქანების მოძრაობის გამო, სახლებში ვერ აღებენ ფანჯრებს, კარებს, ბოსტანი და ხილის ბაღი ვერ გამოუყენებიათ. მათი თქმით, მიუხედავად ადგილობრივი ხელისუფლებისთვის არაერთი თხოვნისა და მიმართვისა, მათი პრობლემით არავინ დაინტერესებულა. ბევრჯერ მიიღეს დაპირება, რომ პრობლემა მოიხსნებოდა, თუმცა არანაირი შედეგი არ არის.

ადგილობრივების თქმით, მძღოლების უმრავლესობა გადამეტებული სიჩქარით მოძრაობს, რაც სახლების რყევას იწვევს. შედეგად სახლის კედლები დაიბზარა და რამდენიმე ჩამონგრეულია.

„ბავშვებს ნუ დაგვიწყვიტავენ, სად მიდის ამდენი დანაპირები, როდემდე უნდა ვიყოთ ამ მდგომარეობაში?! ივანიშვილის მანქანების და ბიზნესის გამო ბავშვები იწამლება. იძულებული ვართ სოფელი დავტოვოთ. აქ ზაფხულში ცხოვრება არ შეიძლება. ახლა ამბობენ, ამ ქუჩაზე კეთდება ტურისტული ბაზაო, ეს არის მორიგი ტყუილი. ტურისტული ბაზა გვაკლია ამ ქუჩაზე დანარჩენი აწყობილია.“

„პირველ რიგში გვინდა გზა, მძიმეწონიანი მანაქანები მტვერს აყენებენ, აქვე სკოლაა და ბავშვები რომ ბრუნდებიან სახლში, დამტვერილები არიან. ხელისუფლებას არაერთხელ მივმამართეთ, არანაირი რეაგირება არ მოჰყოლია. გვპირდებიან რომ გავაკეთებ-თქო. ვითხოვთ, ნუ დადიან ეს სატვირთო მანქანები, სახლები დაიბზარა. დანგრევამდეა მისული, მოგვაშორონ ეს მანქანები.“

მუნიციპალიტეტის გამგებელი მერაბ ჭანუყვაძე აქციის მონაწილეებთან შეხვედრისას აცხადებს, რომ უახლოეს დღეებშიადგილობრივებს მიაწვდიან დაზუსტებულ ინფორმაციას, თუ რა დრო დაჭირდება გზის აღდგენითი სამუშაოების დაწყებას.