Reuters-ი რ2-ზე: უზენაესი სასამართლოს გადაწყვეტილება თვისუფალი მედიის გაჩუმების მცდელობად შეფასდა

პოლიტიკა - 13:43, 03 Mar, 2017

1695

რუსთავი 2-ის საქმეზე უზენაესი სასამართლოს გადაწყვეტილებასთან დაკავშირებით ინფორმაცია უცხოური საინფორმაციო საშუალებებიდან ერთ-ერთმა პირველმა, სააგენტო R euters-მა გაავრცელა.

„საქართველოს უზენაესმა სასამართლომ შეცვალა ქვეყნის ყველაზე დიდი დამოუკიდებელი ტელეკომპანია რუსთავი 2-ის მფლობელობა, დაუბრუნა ყოფილ თანამფლობელს, რაც ქვეყანაში და მის ფარგლებს გარეთ კრიტიკა და თავისუფალი მედიის გაჩუმების მცდელობად შეფასდა“ - ნათქვამია სტატიაში.

საინფორმაციო სააგენტო ყურადღებას ამახვილებს იმ ფაქტზე, რომ გადაწყვეტილების გამოცხადების შემდეგ სასამართლოს შენობასთან შეკრებილმა ასობით მაყურებელმა, ოპოზიციონერმა პოლიტიკოსებმა და რუსთავი 2-ის მომხრეებმა, მხარდაჭერის გამოსახატად კომპანიის სტუდიაში გადაინაცვლეს.

Reuters წერს, რომ ტელეარხი 2015 წლის აგვისტოდან იბრძოდა სასამართლოში, როდესაც ქვედა სასამართლომ ქიბარ ხალვაშის სასარგებლოდ მიიღო გადაწყვეტილება და მისთვის საკონტროლო პაკეტის დაბრუნება მოითხოვა განაჩენში.

სტატიის ავტორი, ასევე იხსენებს, რომ ხელისუფლების წარმომადგენლები ტელეკომპანიას მიკერძოებულობაში ადანაშაულებენ.

„კრიტიკოსებს კი მიაჩნიათ, რომ ქიბარ ხალვაში, მმართველი „ქართული ოცნების“ მხარდამჭერი, გააჩუმებს მთავრობის მიმართ ერთადერთი ძლიერი კრიტიკული მედიის ხმას” - წერს "როიტერსი".

გამოცემა აქცენტს აკეთებს იმაზეც, რომ პოლიტიკოსებთან და ექსპერტებთან ერთად, საკუთარ შეშფოთებას უცხოელი დიპლომატებიც გამოხატავენ.

სააგენტო აღნიშნავს, რომ საქართველოში აშშ-ის საელჩო შეშფოთებით უყურებს უზენაესი სასამართლოს ამ გადაწყვეტილებას, ვინაიდან „აღნიშნულმა შესაძლოა შეზღუდოს ოპოზიციის წვდომა ქართულ მაუწყებელ მედიაზე“.

"პლურალისტური მედია უმნიშვნელოვანესია საქართველოს დემოკრატიული ზრდისა და ევრო-ატლანტიკური მისწრაფებებისთვის" - ციტირებს როიტერსი აშშ-ის საელჩოს.