"რუსთავის 2"-ის შესახებ სასამართლო გადაწყვეტილებას ევროპელი პოლიტიკოსები ეხმიანებიან

პოლიტიკა - 10:09, 03 Mar, 2017

4137

უზენაესი სასამართლოს მიერ რუსთავი2-თან დაკავშირებით მიღებულ გყადაწყვეტილებას უცხოელი პოლიტიკოსები ეხმაურებიან.

ევროპის სახალხო პარტიის ვიცე პრეზიდენტის, ევრო პარლამენტარ იაცეკ სარიუშ ვოლსკის თქმით საქართველომ გეგმის განსახორციელებლად უვიზო მიმოსვლის მიღებამდე მოიცადა:

„როგორც მოსალოდნელი იყო, საქართველოს მთავრობამ რუსთავი 2-ის, უკანასკნელი დამოუკიდებელი ტელეარხის, ხელში ჩასაგდებად გულუბრყვილო ევროკავშირისგან უვიზო მიმოსვლის მიღებამდე მოიცადა“ - წერს სარიუშ ვოლსკი Twitter-ზე.

მოვლენებს ეხმიანება ევროპარლამენტარი ანა გომესიც, მისი თქმით, ის დამწუხრებულია საქართველოს უზენაესი სასამართლოს გადაწყვეტილების გამო და შიშობს, რომ ეს ქვეყანაში პლურალიზმს შეამცირებს, რაც შემდგომ პოლარიზებულ პოლიტიკურ სივრცეს შექმნის.

მოვლენებს ეხმიანება კიდევ ერთი ევროპარლამენტარი შვედეთიდან და ევროპის სახალხო პარტიის წევრი გუნარ ჰოკმარკი. მისი თქმით, სასამართლომ სამწუხარო გადაწყვეტილება მიიღო, რომელიც ძირს უთხრის მედიის თავისუფლებას.

მომხდარს სამწუხაროს უწოდებს ევრო პარლამენტარი და ლატვიის ყოფილი საგარეო საქმეთა მინისტრი სანდრა კალნიეტეც. Facebook-ზე გაკეთებულ ვრცელ განცხადებაში ის საქართველოს მთავრობას მოუწოდებს უზრუნველყოს მედია პლურალიზმი ქვეყანაში.

მოვლენებს ეხმიანება ეუთოს წარმომადგენელი დუნია მიატოვიჩიც. ის Twitter-ზე წერს, რომ ეს ნაბიჯი იმედების გაცრუებას იწვევს და მედია პლურალიზმისთვის დიდი დარტყმაა.