„ქრონიკა პლიუსის“ რედაქტორი ელისო კილაძე აცხადებს, რომ საქართველოს უზენაესი სასამართლო რუსთავი 2-ს სავარაუდოდ ქიბარ ხალვაშს მიაკუთვნებს. ჟურნალისტის ინფორმაციით ეს გადაწყვეტილება იუსტიციის მინისტრის, თეა წულუკიანის კაბინეტში გუშინ დაიწერა:

„მე არ მჯერა, რომ სასამართლო მიიღებს ობიექტურ გადაწყვეტილებას, მეტსაც გეტყვით გადაწყვეტილება უკვე მიღებულია და დაწერილია თეა წულუკიანის კაბინეტში წუხელ. ნინო გვენეტაძემ მიიტანა ეს გადაწყვეტილება და დღეს ყველაზე საინტერესო უკვე არის ის თუ რამდენი მოსამართლე მოაწერს ამ უსამართლობას ხელს, ხელისუფლებას ვურჩევ დაიხიოს უკან, მედიასთან ომი არავის მოუგია, დღეს თუ ვერ მოვახერხეთ რუსთავი 2-ის დაცვა, შეიძლება შემდეგი ნებისმიერი მედიასაშუალება იყოს, რომლის აზრიც ხელისუფლებას არ მოეწონება. ამ უკანონო გადაწყვეტილების აღსრულება, რომლის მიღებასაც დღეს ამ შენობაში აპირებენ მათ მოუწევთ სპეცდანიშნულების რაზმით ჟურნალისტთა კორდონზე გადავლა. გამოწვევა მიღებულია. ჩვენ მზად ვართ ამ ბრძოლისთვის, ვნახოთ როგორ გაუვათ“, - განაცხადა „ნიუპოსტთან“ საუბრისას ელისო კილაძემ.