მმართველი გუნდის პოზიციაა, რომ პრეზიდენტის არაპირდაპირი არჩევის წესი 7 წლის შემდეგ ამოქმედდეს

პოლიტიკა - 14:02, 02 Mar, 2017

1301

საქართველოს პარლამენტის თავმჯდომარემ საკონსტიტუციო კომისიის წევრებს პრეზიდენტის არჩევის წესთან დაკავშირებით მმართველი გუნდის ხედვები გააცნო. ირაკლი კობახიძის თქმით მათი მიზანია, რომ მოხდეს სრულად საპარლამენტო მმართველობაზე გადასვლა, თუმცა იმისთვის, რომ პოლიტიკურ ძალებს და საზოგადოებას აჩვენონ , რომ გარკვეული გადაწყვეტილებების მიღება კონკრეტულ მოცემულობაში, კონკრეტულ პერსონალიებთან დაკავშირებით არ ხდება, მმართველი გუნდის შეთავაზებაა, რომ პრეზიდენტის არაპირდაპირი არჩევის წესზე გადასვლა 7 წლის შემდეგ მოხდეს.

“გვინდა დავანახოთ ყველას რომ ჩვენი ამოცანა არაა კონკრეტულ მოცემულობაში, კონკრეტულ პერსონალიებთან დაკავშირებით გარკვეული გადაწყვეტილებების მიღება. აქედან გამომდინარე ჩვენ ვფიქრობთ რომ პრეზიდენტის არაპირდაპირი არჩევის წესი, რომელიცაა საბოლოო წერტილი სადაც შეიძლება რომ მივიდეთ, ეს წესი უნდა ამოქმედდეს მოგვიანებით. ამ სისტემის ჯანსაღი ფუნქციონირებისათვის მნიშვნელოვანია რომ 7 წლის თავზე ჩვენ გადავიდეთ არაპირდაპირი არჩევის წესზე. არაპირდაპირი და პირდპირი არჩევნები რეალურად პრეზიდენტის კომპეტენციებს არ ცვლის, რომელიც გაწერილია მოქმედი კონსტიტუციით. პრეზიდენტი უნდა იყოს არბიტრი და არა პოლიტიკური ფიგურა, ესაა ერთ-ერთი მთავარი ფუნდამენტი საპარლამენტო მმართველობის. იყო ძალიან ბევრი სპეკულაცია, რომ ჩვენ პრეზიდენტის სტატუსისა და კომპეტენციის შეზღუდვა გვინდა. რომ მივყევით სტატუსისა და კომპეტენციების მარეგულირებელ ნორმებს, გამოვიდა ისე , რომ კონსტიტუციაში პრეზიდენტის თავიდან ვერაფერს ვერ ამოიღებ, იმდენად რადიკალურად და ფუნდამენტურად შეზღუდულია უკვე პრეზიდენტის უფლებამოსილებები 2010 წელს. მხოლოდ მინიმალურ კორექტივებს თუ შევიტანთ, ცვლილებასაც ვერ დავარქმევთ, თორემ ამაზე მეტად პრეზიდენტის უფლებამოსილებების შეზღუდვა პრაქტიკულად შეუძლებელია. ჩვენ თითქმის არ ვეხებით სტატუსს, თითქმის არ ვეხებით უფლებამოსილებებს. “- განაცხადა ირაკლი კობახიძემ.