უზენაესი სასამართლოს დიდი პალატა დღეს ტელეკომპანია რუსთავი 2-ის საქმეზე საბოლოო გადაწყვეტილების მიღებასთან მიმართებით იწყებს განხილვებს. სასამართლოს შენობასთან აქცია მიმდინარეობს.

აქციაზე იმყოფება თამრიკო ჩხეიძე. როგორც „ნიუპოსტს“ ჩხეიძემ განუცხადა, ხელისუფლება, რომელიც კრემლის ხელდასმულია ჩქარობს სისრულეში მოიყვანოს კრემლის დავალება:

„აქციაზე იმიტომ ვარ, რომ ეს ჩემი ბუნებრივი ადგილია, ჩემს აქ ყოფნას საერთო არაფერი აქვს იმასთან, თუ რა დამოკიდებულება მაქვს რუსთავი 2-თან ან იმ პოლიტიკურ ძალასთან რომელთანაც ასოცირდება ეს ტელეკომპანია. არ აქვს მნიშვნელობა დადებითად თუ უარყოფითად აფასებს ადამიანი რუსთავი 2-ის სარედაქციო პოლიტიკას. დღეს დგას ძალიან მარტივი ჭეშმარიტება ხელისუფლებას სურს მოსპოს მძლავრი განსხვავებული აზრი. ამ დროს ადამიანს, რომელსაც ოდნავი წარმოდგენა მაინც აქვს დემოკრატიულ ფასეულობებზე და ქვეყნის ინტერესებზე, ყველა ადმიანის ბუნებრივი ადგილი უნდა იყოს აქ. სამწუხაროა, რომ ღირებულებები მოსახლეობის ნაწილს გაცნობიერებული არ აქვს, დღეს მხოლოდ სიტყვის და გამოხატვის, მედიის თავისუფლების საკითხი არ არის, მართალია ეს საკმარისია იმისთვის, რომ ყველა აქ ვიყოთ, თუმცა, დგას საკითხი იმისა, რომ რუსეთი აჩქარებს მის მიერ ხელისუფლებაში მოყვანილ ივანიშვილის, რომ სასწრაფოდ გადადგას სტრატეგიული ნაბიჯები ქართული სახელმწიფოს წინააღმდეგ, ეს იქნება რკინიგზის გახსნა თუ სხვა მავნებლობები“, - განაცხადა თამრიკო ჩხეიძემ.

მისი თქმით საპატრიარქოში მიმდინარე პროცესების უკან რუსეთი დგას:

„საპატრიარქოს წინააღმდეგ, ქართული ეკლესიის წინააღმდეგ და მისი დისკრედიტაციისკენ მიმართული პროცესის უკან რუსეთი დგას, რადგან ეკლესია მიუხედავად მისი სხვადასხვა გავლენებისა, ერთ-ერთი მთავარი დასაყრდენია საქართველოს ტერიტორიული მთლიანობისა და ოკუპაციასთან შეურიგებლობის, ამიტომ რუსეთის ერთ-ერთი სამიზნე სწორედ საქართველოს პატრიარქი ილია მეორეა“, - აღნიშნა თამრიკო ჩხეიძემ.