„საქართველო მტკიცედ მიიწევს წინ ევროკავშირსა და ნატო-ში ინტეგრაციის მიმართულებით"- გიორგი მარგველაშვილი

პოლიტიკა - 17:40, 01 Mar, 2017

1111

საქართველოს პრეზიდენტი გიორგი მარგველაშვილი ბელარუსის რესპუბლიკაში ოფიციალურ ვიზიტს განაგრძობს.

ბელარუსის პრეზიდენტთან პირისპირ შეხვედრის დასრულების შემდეგ, მხარეებს შორის გაფართოებული შეხვედრა გაიმართა, რომელსაც საქართველოს დელეგაციის წევრები და ბელარუსის რესპუბლიკის მთავრობის წევრებიც დაესწრნენ.

პრეზიდენტ მარგველაშვილის განცხადებით, საქართველოსა და ბელარუსის თანამშრომლობა, სხვადასხვა პოლიტიკური, თუ ეკონომიკური ორიენტაციის მქონე ქვეყნების პარტნიორობის წარმატებული მაგალითია.

„საქართველო მტკიცედ მიიწევს წინ ევროკავშირსა და ნატო-ში ინტეგრაციის მიმართულებით, ხოლო ბელორუსია ევრაზიული კავშირის წევრია. ამავდროულად ჩვენ პატივს ვცემთ ერთმანეთის თავისუფალ არჩევანს და ამიტომაც ჩვენი სახელმწიფოების სწრაფვა განსხვავებული ალიანსებისადმი წარმოადგენს არა გამყოფ ხაზს, არამედ იმ უპირატესობას, რამაც კიდევ უფრო მეტად უნდა გააძლიეროს და გააღრმავოს ჩვენს შორის კავშირები. ვფიქრობ, პარტნიორობის ასეთი მაგალითი მისაბაძი უნდა გახდეს სხვა ქვეყნებისთვისაც“, - განაცხადა საქართველოს პირველმა პირმა.

მხარეებმა ხაზგასმით აღნიშნეს, რომ საქართველო-ბელარუსს შორის დარგობრივი თანამშრომლობის შემდგომ გაღრმავებას განსაკუთრებული მნიშვნელობა ენიჭება.

მხარეებმა ხაზგასმით აღნიშნეს, რომ საქართველო-ბელარუსს შორის დარგობრივი თანამშრომლობის შემდგომ გაღრმავებას განსაკუთრებული მნიშვნელობა ენიჭება. ევროპასა და აზიას შორის სატრანსპორტო, სავაჭრო და ენერგეტიკული კავშირების შემდგომი განვითარების მიზნით, საქართველოსათვის ერთერთ უმნიშვნელოვანეს პრიორიტეტს რეგიონული ცენტრის ჩამოყალიბება წარმოადგენს.

საუბარი ასევე შეეხო მიმდინარე წლის ნოემბერში ბრიუსელში დაგეგმილი ევროკავშირის „აღმოსავლეთ პარტნიორობის“ ინიციატივის სამიტის მნიშვნელობას.

აღინიშნა, რომ საქართველო მხარს უჭერს „აღმოსავლეთ პარტნიორობის“ ფორმატის მოქნილობას, რომელიც შესაბამისობაში იქნება ყველა მონაწილე ქვეყნის მოთხოვნებთან, მოლოდინსა და ინტერესებთან.

მხარეებმა დაინტერესება გამოხატეს გააძლიერონ თანამშრომლობა „აღმოსავლეთ პარტნიორობის“ ფარგლებში, საერთო ინტერესების საკითხებში არსებული შესაძლებლობებისა და რესურსის გამოყენებასთან დაკავშირებით.

გიორგი მარგველაშვილის განცხადებით, ქართული მხარე მზადყოფნას გამოთქვამს ბელარუს კოლეგებს გაუზიაროს საკუთარი გამოცდილება ეკონომიკური რეფორმების მიმართულებით. შეხვედრისას საუბარი შეეხო ასევე ტურიზმის მიმართულებით გაუმჯობესებულ მაჩვენებლებსაც.

შეხვედრის დასრულების შემდეგ, გიორგი მარგველაშვილმა და ალექსანდრე ლუკაშენკომ ერთობლივ განცხადებას მოაწერეს ხელი.

დღესვე ხელი მოეწერა საქართველოსა და ბელარუსის მთავრობებს შორის შეთანხმებებს „საქართველოს მთავრობასა და ბელარუსის რესპუბლიკის მთავრობას შორის ინვესტიციების წახალისებისა და ურთიერთდაცვის შესახებ“ და „საქართველოს მთავრობასა და ბელარუსის რესპუბლიკის მთავრობას შორის საჰაერო მიმოსვლის შესახებ“.

შესაბამის დოკუმენტებს საქართველოს მხრიდან ეკონომიკისა და მდგრადი განვითარების მინისტრმა გიორგი გახარიამ, ხოლო ბელარუსის რესპუბლიკის მხრიდან საგარეო საქმეთა მინისტრმა ვლადიმირ მაკეიმ და ტრანსპორტის მინისტრმა ანატოლი სივაკმა მოაწერეს ხელი.

აღინიშნა, რომ ვიზიტის ფარლებში ორმხრივი შეთანხმებების ხელმოწერა კიდევ უფრო შეუწყობს ხელს სახელმწიფოების თანამშრომლობას, ინვესტიციების ზრდასა და სავაჭრო-ეკონომიკური ურთიერთობების გაფართოებას.

საქართველოს პრეზიდენტის დელეგაციის შემადგენლობაში არიან პრეზიდენტის ადმინისტრაციის უფროსი გიორგი აბაშიშვილი, საქართველოს ეკონომიკისა და მდგრადი განვითარების მინისტრი გიორგი გახარია, ეროვნული უშიშროების საბჭოს მდივანი დავით რაქვიაშვილი, საქართველოს საგარეო საქმეთა მინისტრის მოადგილე ვახტანგ მახარობლიშვილი, პრეზიდენტის საგარეო ურთიერთობათა მდივანი თენგიზ ფხალაძე, პრეზიდენტის მრჩეველი ეკონომიკურ საკითხებში მაია მელიქიძე და პრეზიდენტის საპარლამენტო მდივანი ანა დოლიძე.