„პრეზიდენტის შემდეგი არჩევნები ჩატარდება იმ წესით, რომელიც დღეს არსებობს“- გუგული მაღრაძე

პოლიტიკა - 14:40, 01 Mar, 2017

1797

საპარლამენტო უმრავლესობის წევრმა გუგული მაღრაძემ „კვირას“ პრესკლუბში გამართულ პრესკონფერენციაზე აღნიშნა, რომ 2018 წლის არჩევნები ჩავატარდება ისევ იმ წესით, რომელიც დღემდე არსებობს და ამაზე შეთანხმება თითქმის მიღწეულია.

გუგული მაღრაძემ აღნიშნა, რომ საპარლამენტო რესპუბლიკაში პრეზიდენტის მმართველობის ფორმა შედარებით შესუსტებული იქნება. საპარლამენტო უმრავლესობის წევრი თვლის, რომ პრეზიდენტის ინსტიტუტის არსებობა აუცილებელია, რადგან ის ერთგვარი დამბალანსებლის ფუნქციას ასრულებს.

„როცა გვიკიჟინებენ, რატომ ვართმევთ პრეზიდენტს ფუნქციას, უნდა შევახსენო, რომ ეს არის ვენეციის კომისიის რეკომენდაციები. პრეზიდენტთან უნდა არსებობდეს ისეთი სამსახური, რომელიც შეიკრიბება საჭიროების შემთხვევაში და ვთვლი,რომ არაა საჭირო მუდმივად არსებული უშიშროების საბჭო. ჩვენ ვიღებთ იმ საპარლამენტო რესპუბლიკების სტანდარტს, რაც არსებობს ევროპულ ქვეყნებში. პრეზიდენტის ინსტიტუტის არსებობა აუცილებელია, რადგან ის ერთგვარი დამბალანსებლის ფუნქციას ასრულებს. ჩვენ პრეზიდენტის ფუნქცია უნდა მოვიყვანოთ შესაბამისობაში საპარლამენტო რესპუბლიკასთან. ოპერატიულ მართვას საპარლამენტო ქვეყნებში პრეზიდენტი არ ახორციელებს“, – განაცხადა გუგული მაღრაძემ.

გუგული მაღრაძე აცხადებს, რომ პრეზიდენტის ფუნქცია საპარლამენტო რესპუბლიკაში ჰგავს მონარქის ფუნქციას.